Ирандын расмий өкүлү NBC News телеканалына билдиргендей, Иран экономикалык санкциялардын алып салынышына карата АКШ менен келишим түзүүгө даяр.
Америкалык телерадиокомпаниянын шаршемби күнкү билдирүүсүнө караганда, Ирандын жогорку лидери Али Хаменеинин кеңешчиси Али Шамхани Иран эч качан өзөктүк курал жасабоого жана өтө байытылган урандын запастарын жок кылууга убада бере аларын, аны жарандык колдонуу үчүн зарыл болгон төмөнкү деңгээлде гана байытууга жана эл аралык инспекторлорго процессти көзөмөлдөөгө мүмкүндүк бере ала турганын айтты.
Шамхани белгилүү шарттар аткарылса Ирандын дароо келишимге кол коюуга даяр экенин баса белгиледи.
“Бул дагы деле мүмкүн. Эгерде америкалыктар өздөрү айткандай иш кылса, биз сөзсүз түрдө жакшыраак мамилелерди түзө алабыз", - деди жана "Бул жакынкы келечекте жакшы кырдаалга алып келиши мүмкүн" деп кошумчалады.
‘Зайтун бутагыбы же тикенек зымбы’
Шамханинин бул билдирүүлөрү АКШнын президенти Дональд Трамп шейшемби күнү Иранды Жакынкы Чыгыштагы “эң кыйратуучу күч” деп атап, аймактагы туруксуздуктун себеби катары Тегеранды күнөөлөп, АКШ Иранга ядролук куралга ээ болууга эч качан жол бербейт деп эскерткенден кийин айтылды.
Акыркы эскертүү жана дипломатия үчүн потенциалдуу жолду сунуш кылган Трамп, Иран "хаос жана террор" жолун улантууну же тынчтык жолун кабыл алууну тандоосу керек деди.
Тегеран Жакынкы Чыгыштагы туруксуздукту күчөтүүдө деген айыптоолорду бир нече жолу четке каккан.
Трамп Иран менен жаңы келишим түзүүгө даяр экенин, бирок бул үчүн анын лидерлери өз позицияларын өзгөртүшү керектигин айтты.
“Мен Иран менен келишим түзгүм келет. Бирок эгерде Ирандын жетекчилиги бул зайтун бутакты четке какса, бизде башка арга калбай калат жана максималдуу кысым көрсөтүүгө аргасыз болобуз” деп кошумчалады.
Сауд Арабиянын борбору Эр-Риядда өткөн инвестициялык саммитте сөз сүйлөгөн Трамп “Иран эч качан ядролук куралга ээ болбойт” деп эскертип, келишим сунушу түбөлүккө созулбай турганын айтты.
Шамхани болсо NNBC телеканалына берген интервьюсунда Трамптын сөздөрүнө жана улантылган коркутууларына нааразычылыгын билдирди.
“Зайтун бутагы жөнүндө айтып жатат, бирок биз аны көргөн жокпуз. Баары тикенектүү зым,” - деди.
