Расмий Press TV жана Mehr агенттигинин кабарларына караганда, Ирандын президенти Масуд Пезешкян шаршемби күнү өлкөсү Атомдук энергия боюнча эл аралык агенттик (МАГАТЭ) менен кызматташууну токтотконун жарыялады.
Жарым расмий Tasnim маалымат агенттиги да президент өкмөттүн МАГАТЭ менен байланышын токтотууну талап кылган мыйзамды бекиткенин кабарлады.
Өткөн аптада Иран парламенти МАГАТЭ менен кызматташууну токтотуу боюнча мыйзам долбоорун кабыл алган.
Мындай кадам, Израиль жана АКШ менен болгон соңку аскердик кагылышуулардан кийин Тегеран менен БУУнун өзөктүк көзөмөл органынын ортосунда мониторинг жүргүзүү жана ачык-айкындуулук темаларындагы келишпестик дагы да курчуп кеткенден кийин жасалды.
Израиль менен Ирандын ортосунда 13-июнда башталган 12 күнгө созулган кагылышуу Израиль Ирандын аскердик жана өзөктүк объектилерине абадан сокку урганда тутанган.
Тегеран жооп иретинде ракеталык жана дрондук соккуларды жасап, АКШ да Ирандын үч ядролук объектин бомбалаган. Кагылышуу 24-июнда күчүнө кирген АКШнын ортомчулугундагы ок атышпоо келишими менен токтогон.
