БУУнун колдоосу менен жүргүзүлгөн Интеграцияланган Азык-түлүк коопсуздугунун фазалык классификациясы (IPC) тарабынан дүйшөмбү күнү жарыяланган жаңы анализге ылайык, Судандын Түндүк Дарфур аймагындагы Эль-Фашир шаары менен Түштүк Кордофан аймагындагы Кадугли шаарында ачарчылык тастыкталды.
Эки шаар тең сентябрь айына карата "ачарчылыктын деңгээлинде (IPC 5-фазасы)" деп классификацияланды жана бул шарттар кийинки январга чейин уланары күтүлүүдө.
Мындан тышкары, билдирүүдө Түштүк Кордофан аймагындагы Диллинг шаарынын абалы Кадугли шаарына окшош деп болжолдонгону, бирок маалыматтын жетишсиздигинен улам бул аймакка IPC классификациясы берилбегени айтылды.
Билдирүүдө "конфликттин жүрүшүнө байланыштуу белгисиздик ачарчылык коркунучун күчөтүп, өзгөчө Чоң Дарфур жана Чоң Кордофан аймактарындагы 20 жерге коркунуч туудурат" деп эскертилди.
2025-жылдын сентябрь айында Судандын калкынын 45 пайызы башкача айтканда 21,2 миллион адам, курч азык-түлүк коопсуздугуна (IPC 3-фаза же андан жогору) дуушар болгон. Алардын ичинен 375 миң адам (1 пайыз) катастрофалык ачарчылык (IPC 5-фаза) абалында, ал эми 6,3 миллион адам (13 пайыз) өзгөчө кырдаал (IPC 4-фаза) абалында болгон.
IPC 3-фазасында же андан жогору болгон адамдардын саны ушул октябрь менен келерки январдын ортосунда бир аз кыскарып 19,2 миллионго же калктын 40 пайызына төмөндөйт деп болжолдонууда.
Бирок Түндүк Дарфур жана Батыш Нуба тоолорунда "конфликт жана коопсуздуктун жоктугунан улам түшүм жыйноодон алынган пайда чектелүү бойдон калат.
26-октябрда Ыкчам колдоо күчтөрүнүн (RSF) согушкерлери Эль-Фашир шаарын басып алып, жергиликтүү жана эл аралык уюмдардын маалыматы боюнча, жай тургундарга каршы массалык кыргындарды жасаган. Бул чабуул Судандын географиялык бөлүнүүсүн күчөтүшү мүмкүн деген эскертүүлөр айтылууда.
2023-жылдын апрель айынан бери Судан армиясы менен RSF парамилитардык күчтөрү ортосунда согуш жүрүп жатат. Регионалдык жана эл аралык ортомчулук аракеттерине карабастан бул конфликт токтотула элек. Согуш миңдеген адамдардын өмүрүн алып, миллиондогон адамдарды жер которууга мажбур кылды.
