АКШ президенти Дональд Трамп Орусиянын президенти Владимир Путин менен саммит өткөрүү пландарын токтотконун, анткени жыйындын натыйжасыз болушу мүмкүн экенин айтты.
Трамп шейшемби күнү Ак үйдө журналисттерге жолугушуунун токтотулушунун себеби тууралуу суроого жооп берип жатып «Мен натыйжасыз жыйын өткөрүүнү каалабайм», – деди. «Убакытты текке кетиргим келбейт, ошондуктан эмне болорун көрөм», – деп кошумчалады.
АКШ президенти Украинадагы фронт линияларын тоңдура турган ок атышууну токтотуу талабын эске салып: «Мен айттым: “Чекке баргыла. Согуш талаасынын сызыктарына барып артка кайткыла, үйүңөргө баргыла, баарыңар эс алгыла, анткени эки өлкө бири-бирин өлтүрүүдө, эки өлкө жумасына 5-7 миң аскерин жоготуп жатат”», – деди.
Шейшемби күнү Ак үйдүн бир өкүлү, Трамп менен Путиндин пландалган экинчи саммити мамлекеттик катчы Марко Рубио менен Орусиянын тышкы иштер министри Сергей Лавровдун "жемиштүү" сүйлөшүүсүнөн кийин токтотулганын билдирди.
16-октябрда Путин менен телефон аркылуу сүйлөшкөндөн кийин Трамп эки жуманын ичинде Венгриянын Будапешт шаарында Орусиянын президенти менен жолугушууну пландап жатканын жарыялаган жана бул жыйындын чоо-жайын тактоо үчүн Лавров менен Рубио ушул жумада жолугушарын айткан. Бирок Ак үйдүн өкүлүнүн айтымында, бул жолугушуу да токтотулду.
Күтүүсүз өзгөрүүнүн себеби дароо такталган жок, бирок Орусия Кремлдин үч жарым жылдан ашуун убакыттан бери уланып келе жаткан согушундагы азыркы фронт линияларын сактап кала турган ок атышпоо жөнүндөгү Трамптын талабына каршы чыкты.
Лавров шейшемби күнү журналисттерге АКШнын дароо ок атышууну токтотуу талабы август айында Аляскада өткөн саммитте Орусия менен АКШ лидерлери тарабынан кабыл алынган мурунку макулдашууларга каршы келерин айтты.
“Азырынча чечим чыга элек”
Орус тышкы иштер министри европалык аткаминерлер америкалык кесиптештерин туруктуу чечимге эмес, убактылуу ок атууну токтотууга үндөп жатканын айтты.
Трамп «чечим кабыл ала элекмин» деп кошумчалады, бирок ал эмнени айтып жатканын тактаган жок.
Украина АКШдан Орусиянын ичине терең сокку уруу үчүн «Томагавк» канаттуу ракеталарын берүүнү талап кылды. Ал арада Сенат Кремлди бутага алган жаңы санкциялар пакетинин долбоорун иштеп чыкты. Сенаттагы көпчүлүктүн лидери Жон Тун бул пакеттин Ак үйдүн бекитүүсүн күтүп жатканын билдирди.
Санкциялар пакети Сенатка сунушталгандан кийин тез эле бекитилери анык. Учурда 100 мүчөлүү Сенатта 85 демөөрчү бар.
Трамп шаршемби күнү Ак үйдө НАТОнун баш катчысы Марк Рютте менен жолугушат.
