АКШнын президенти Дональд Трамп Кытайда жайгашкан ByteDance компаниясына таандык TikTok тиркемесинин АКШдагы активдерин сатуу боюнча 19-июнга белгиленген мөөнөттү узартууга даяр экенин билдирди. Бул кыска видеолорду бөлүшүүчү тиркеме 170 миллион америкалыктар тарабынан колдонулат. Эгерде ошол убакытка чейин келишимге жетишилбесе мөөнөт узартылышы мүмкүн.
Жума күнү Флорида штатындагы Палм-Бичте Мар-а-Лагодогу үйүндө тартылган жана жекшемби күнү АКШнын жалпысында эфирге чыга турган маегинде NBC Newsтин “Meet the Press with Kristen Welker” программасына маалымат берген Трамп: “Мен мунун аткарылышын каалайм” деди.
Трамп TikTok тиркемесине “өзгөчө көңүл” буруп жатканын, анткени бул тиркеме ага 2024-жылдагы президенттик шайлоодо жаш шайлоочулардын колдоосун алууга жардам бергенин айтты. “TikTok абдан кызыктуу, бирок ал корголот,” - деп кошумчалады.
Трамп буга чейин TikTokко Конгресс тарабынан киргизилген тыюуну аткаруу мөөнөтүн эки жолу узарткан. Бул тыюу январь айында күчүнө кириши керек эле.
Келишим боюнча TikTokтун АКШдагы ишмердүүлүгү АКШда жайгашкан жана америкалык инвесторлордун көпчүлүк үлүшүнө ээ болгон жаңы компанияга өткөрүлүп берилмек. Бирок бул процесс Трамптын Кытай товарларына жогорку тарифтерди киргизүү тууралуу билдирүүсүнөн кийин Кытайдын макулдугу болбогондуктан токтоп калган.
Демократ сенаторлор Трамптын мөөнөттү узартууга мыйзамдуу укугу жок экенин айтып, сөз болуп жаткан келишим мыйзам талаптарына жооп бербей турганын белгилешүүдө. ByteDanceтин АКШдагы инвесторлоруна жакын бир булак өткөн айда келишим боюнча иштер улантылып жатканын, бирок Ак үй менен Пекин алгач тарифтер боюнча талашты чечиши керектигин билдирген.
Трамп NBC News каналына, Кытай келишимге жетүүнү каалап жатканын, анткени Кытай товарларына киргизилген 145 пайыздык тарифтер алардын экономикасына таасир берип жатканын айтты. Пекинди соодалашуу үстөлүнө отургузуу үчүн тарифтерди төмөндөтпөй турганын, бирок бара-бара кеңири келишимдин алкагында аларды төмөндөтүшү мүмкүн экенин белгиледи.
“Кандайдыр бир убакта мен аларды төмөндөтөм, анткени алар менен бизнес жүргүзүү мүмкүн болбой калат. Алар да биз менен иштешүүнү абдан каалап жатышат,” - деди.
Мыйзам боюнча TikTok 19-январга чейин ишин токтотушу керек болчу, эгерде ByteDance тиркеменин АКШдагы активдерин сатуу процессин бүтүрбөсө. Трамп президенттиктин экинчи мөөнөтүн 20-январда баштаган жана бул мыйзамды аткарбоо чечимине келген. Ал мөөнөттү алгач апрелдин башына, андан кийин өткөн айда 19-июнга чейин узарткан.
