Австралия менен Вьетнам ар тараптуу стратегиялык өнөктөштүктү тереңдетүү аркылуу коргонуу жана коопсуздук тармагындагы кызматташтыкты арттырууга макулдашышты.
Австралиянын Премьер-министрлик кеңсесинин билдирүүсүндө, Австралиянын премьер-министри Энтони Албаниз өлкөсүнө барган Вьетнамдын президенти То Лам менен жолугушканы белгиленди.
Билдирүүдө лидерлер эки өлкөнүн ортосундагы ар тараптуу стратегиялык өнөктөштүктү тереңдетүү боюнча келишим түзүп, коргонуу, коопсуздук жана соода тармактарында кызматташууну бекемдөөгө макулдашканы кабарланды.
Эки өлкөнүн персоналды окутуу, маалымат алмашуу, ден соолук, деңиз коопсуздугу жана издөө-куткаруу иштери, ошондой эле кибердик кылмыштар, интернет алдамчылыгы, адам сатуу жана терроризм менен күрөшүү сыяктуу темаларда кызматташтыкты арттыруу боюнча макулдашкандары билдирилип, Албаниз менен То Ламдын Түштүк Кытай деңизиндеги абалдан «тынчсызданганы» айтылды.
Билдирүүдө лидерлердин Түштүк Кытай деңизинде тынчтыкты, коопсуздукту, ырааттуулукту жана кеме жүрүү эркиндигин сактоонун маанилүүлүгүн баса белгилеп, чыңалууну сүйлөшүү жолу менен чечүүгө чакырышканы маалымдалды.
Албаниз менен То Ламдын Мьянмадагы кризистин чечилиши үчүн Түштүк-Чыгыш Азия мамлекеттеринин ассоциациясы (АСЕАН) макулдашкан 5 берененин ишке ашырылышын жана «зордук-зомбулукту тез арада токтотуу, гуманитардык жардамга тоскоолдуксуз жетүү жана инклюзивдик диалог түзүүнү» талап кылганы билдирилди.
