Карл Скау Нью-Йорктогу БУУнун штаб-квартирасында өткөн күнүмдүк басма сөз жыйынында Жакынкы Чыгыштагы көйгөйлөр боюнча жаңыланган маалымат менен бөлүштү.

Газадагы лагерлерде жашаган палестиналыктар "күнүнө бир маал гана ысык тамак жей алышат" жана тамак жасоого газ да таба алышпайт деп билдирген Скау, каржылоонун жетишсиздигине көңүл бурду.

Скау: "Мунун бирден-бир себеби - каражаттарыбыз азайып кетти; башкача айтканда, азыркы жардам деңгээлин сактоо үчүн бизде жетиштүү ресурстар жок. Биз эң муктаж болгондорго артыкчылык берүүгө аракет кылабыз. Бул оңой процесс эмес", - деди.

Газа элинин психологиялык абалына токтолгон Скау: "Адамдар үмүтүн үзө баштады. Ок атышууну токтотуунун башында, ал тургай январь жана февраль айларында да, абал жакшырат деген үмүт бар болчу. Адамдар өз жашоосун кайра кура алышат деген ишеним бар эле. Бирок азыр жашоо дээрлик токтоп калгандай сезим бар", - деди.

Карл Скау Израилдин чабуулдары жана гуманитардык жардамдын кирүүсүнө чектөөлөр уланып жаткан Газада көптөгөн адамдар "унутулуп калгандай сезгендерине" көңүл бурду.

Газа үчүн көбүрөөк иш-аракет кылууга убакыт келгенин билдирген Скау "Биз жетишкендиктерибизди коргоп, ачарчылыктын алдын алууга багытталган программаларды улантып, ал тургай андан да көбүн жасашыбыз керек", - деп кошумчалады.