УЕФА 24-апрелде Стамбул шаарында жаңы өкүлчүлүк кеңсесин расмий түрдө ачат. Бул кеңсе Лондон жана Брюсселден кийинки үчүнчү эл аралык борбор болуп саналат.
Түркиянын Футбол федерациясынын (TFF) билдирүүсүнө караганда, УЕФАнын Стамбулда кеңсе ачуу чечими TFF тарабынан башталган сүйлөшүүлөрдүн натыйжасында кабыл алынган. Кеңсе TFFге таандык тарыхый Левент павильонунда жайгашат жана УЕФАнын Лондон менен Брюсселден кийинки үчүнчү чет өлкө борбору катары кызмат кылат.
Континенттерди бириктирген, тарых менен цивилизациянын кесилиши болгон Стамбул дүйнөлүк футболдун маанилүү борборлорунун бири болууга даярданууда.
Түркиянын президенти Режеп Таййип Эрдоган УЕФАнын Стамбулдагы кеңсесинин ачылыш аземине катышат.
Ачылыш аземи 24-апрель бейшемби күнү саат 12:00дө болот. Салтанатка УЕФАнын башчысы Александр Чеферин, УЕФАнын башкаруу кеңешинин мүчөлөрү жана мүчө мамлекеттердин федерацияларынын жетекчилеринин да катышаары күтүлүүдө.
Стамбул: УЕФА финалдарынын шаары
УЕФАнын жаңы өкүлчүлүк кеңсесин кабыл алган Стамбул буга чейин бир нече ири эл аралык футбол финалдарын өткөрүү менен көңүлдү өзүнө бурган.
Бүгүнкү күнгө чейин шаар 2005-жылы УЕФА Чемпиондор Лигасынын финалын, 2009-жылы УЕФА Кубогунун финалын, 2019-жылы УЕФАнын Суперкубогун жана 2023-жылы УЕФА Чемпиондор Лигасынын финалын ийгиликтүү өткөргөн.
Келерки жылдан тарта Түркия УЕФАнын дагы эки чоң финалына катары менен кожоюндук кылат. Стамбул 2026-жылы УЕФА Европа Лигасынын финалын өткөрүп, 2027-жылы УЕФА Европа Конференция Лигасынын финалы болсо жаңы стадиондун бүтүшүнө жараша Стамбулда же Анкарада уюштурулат.
УЕФАнын Стамбулдагы кеңсеси 2032-жылы Түркия менен Италия биргелешип өткөрө турган УЕФА Европа Чемпиондугуна даярдык көрүүдө да активдүү роль ойнойт деп күтүлүүдө.
