АКШнын президенти Дональд Трамп Түркиянын президенти Режеп Таййип Эрдоган Орусия менен Украинанын ортосундагы согушту токтотууда роль ойной алат деп билдирди.
Трамп дүйшөмбү күнү Египеттен Ак үйгө кайтып келе жатканда Air Force One учагында журналисттерге берген билдирүүсүндө, лидерлер өзгөчө Эрдоган Орусия менен Украинанын ортосундагы согушту токтотууда жардам бере алабы деген суроого “Эрдоган муну жасай алат”, – деп жооп берди.
Түркия 2022-жылдын февраль айында башталган Орусия-Украина согушун токтотуу аракетин улантууда.
Анкара Киев менен Москваны жаңжалды сүйлөшүү жолу менен токтотууга чакырып, тынчтыктын пайдубалын түптөө үчүн бардык демилгелерге, анын ичинде ортомчулукка даяр экенин билдирди.
Зеленский менен жолугушуу
Учакта Украина боюнча суроолорго жооп берип жатып Трамп жума күнү Ак үйдө Украинанын президенти Владимир Зеленский менен жолугарын ырастады.
Буга чейин Зеленский украин делегациясы АКШга бир катар жолугушууларды өткөрүү үчүн бара жатканын жана жума күнү Трамп менен жолугарын айткан.
“Жума күнү Вашингтонго барып, президент Трамп менен жолугушууга да мүмкүнчүлүгүм болот”, – деди Зеленский X платформасында.
“Мен бир катар кадамдарды сунуштоону көздөп жатам. Диалогубуз жана колдоосу үчүн президент Трампка ыраазычылык билдирем” деп кошумчалады.
Сапардын негизги максаты абадан коргонуу жана узак аралыкка учуучу системалар экенин айтып, «тынчтыкты орнотуу багытында Орусияга кысым көрсөтүү үчүн» бул темалардын талкууланарын баса белгиледи.
