Украинанын президенти Владимир Зеленский фронттогу согуштук аракеттерди токтотууга жана согушту аяктоо үчүн Россия менен дипломатиялык сүйлөшүүлөрдү жүргүзүүгө даяр экенин билдирди.
Зеленский шаршемби күнү Fox News телеканалына берген маегинде Украина Россиядан кеминде ок атышууну токтотууну күтүп жатканын, андан кийин Киев АКШ менен Европа өлкөлөрүнөн коопсуздук кепилдиктерин талап кыларын билдирди.
«Ооба, биз азыр согуштук аракеттерди токтотушубуз керек. Менимче, бул согушту аяктоонун реалдуу жолу», — деди Украинанын президенти.
Тынчтык менен коопсуздук негизги артыкчылык экенин баса белгилеген Зеленский Киев коопсуздук кепилдиктерин алуу үчүн АКШнын президенти жана Европа лидерлери менен байланышарын билдирди.
Украина согушту токтотуу үчүн Донбасс аймагынан баш тартабы деген суроого Зеленский украиналыктар кагылышуулардан чарчаганын, бирок өз жерлеринен жөн эле баш тарта албай турганын айтты.
Россиянын согуш талаасында жеңишке жеткени тууралуу дооматтарды четке каккан Зеленский Москва украин күчтөрүн өз аймагынан чыгарууга аракет кылып жатканын билдирди.
«Алар ийгиликке жетише алышкан жок. Согуш талаасында жеңишке жете алышпайт», — деди Зеленский.
Украинанын лидери сүйлөшүүлөр азыркы фронт сызыгында башталып, дипломатиялык жол менен тынчтык планы иштелип чыгышы керектигин кайталады.
Ок атышууну токтотууга карата кадамдар
Зеленский шейшемби күнү Норвегиянын Осло шаарында АКШнын атайын өкүлү Стив Виткофф менен болгон жолугушуусун «түшүмдүү» деп мүнөздөдү.
Сүйлөшүүлөрдү уюштурганы үчүн Норвегиянын премьер-министрине ыраазычылык билдирген Зеленский жолугушууга Европа лидерлери жана алыстан катышкан Джаред Кушнер баш болгон АКШнын расмий өкүлдөрү да катышканын белгиледи.
Ал сүйлөшүүлөр тынчтыкка карай ыктымалдуу кадамдарга багытталганын айтып, Виткоффтун Россиядагы байланыштары аркылуу жаңы сунуштардын айтыларынан үмүттүү экенин билдирди.
Украина лидери чыңалууну басаңдатууга багытталган алгачкы кадамдар азык-түлүк коопсуздугу, деңиздеги ишмердүүлүк жана энергетикалык инфраструктура боюнча ок атышууну токтотууну камтышы мүмкүн экенин билдирди.
Өзгөчө АКШнын президенти Дональд Трамптын энергетика тармагында ок атышууну токтотуу боюнча сунушун колдой турганын кошумчалап: «Бүгүн, бир нече сааттын ичинде белгилүү бир натыйжаларга жетишебиз деген үмүттөмүн», — деди.
