Россиянын Тышкы иштер министрлиги Армениядагы элчисин сүйлөшүү үчүн Москвага  чакыртканын жарыялады.

Министрликтин билдирүүсүндө Россиянын Еревандагы элчиси Сергей Копыркин Москвага сүйлөшүү үчүн чакырылганы маалымдалды.

Мунун Армения өкмөтүнүн Европа Биримдиги (ЕБ) менен жакындашуу боюнча кадамдарына байланыштуу экени белгиленип: "Бул кадамдар Евразия Экономикалык Биримдигинин (ЕАЭБ) алкагындагы кызматташтыкка зыян келтирип жатат",- деп айтылды.

Россиянын Тышкы иштер министрлигинин басма сөз катчысы Мария Захарова өткөн аптада Армениянын ЕБ менен жакындашуусу эки тараптуу мамилелерди жана стратегиялык өнөктөштүктү алсыратып жатканын белгилеп: "Армения башкаруусунун ЕБ менен жакындашуу процесси уланып жаткандыктан Евразия Экономикалык Биримдигинде болуу  аракети Россия үчүн кабыл алынгыс",- деп баа берген. 

Россиянын президенти Владимир Путин да Армения ЕБге кошула турган болсо, орус базарына жиберген айыл -  чарба продукциялары үчүн Евразия Экономикалык Биримдиги стандарттарынын эми күчүндө болбой турганын билдирди.

Армениядагы кырдаалды Украинага окшоштурган Путин: «Украинадагы кризис бир кезде Украинанын Европа Биримдигине кирүү аракеттери менен башталган», — деди.