Түркиянын Тышкы иштер министрлиги бейшемби күнкү билдирүүсүндө, Газада ок атышпоонун камсыздалышын кубаттап, мунун "акыркы эки жылдан бери уланып келе жаткан геноцидди токтотушун" үмүт кылганын кабарлады.

Министрлик билдирүүсүндө, ок атышпоо келишиминин толук аткарылышын күткөндөрүн белгилеп, “ок атышуунун токтотулушу менен бирге Газага гуманитардык жардамдын жеткирилиши жана аны кайра куруу иштеринин тез арада башталышы абдан маанилүү. Түркия алдыдагы мезгилде Газага олуттуу гуманитардык жардам көрсөтүүнү улантат” деп айтылды.

Жакынкы Чыгышта туруктуу тынчтыкты Израиль-Палестина маселесин адилеттүү чечүү аркылуу гана орнотуу мүмкүн экенине басым жасаган министрлик, “ок атышууну токтотуу боюнча сүйлөшүүлөрдө жетишилген ийгилик алдыдагы мезгилде эки мамлекеттүү чечимди ишке ашырууга да салым кошот” деп үмүттөнөрүн билдирди.

Ошондой эле “Катар, Египет жана АКШнын ок атышууну токтотуу боюнча сүйлөшүүлөрдөгү аракеттерин жогору баалайбыз. Түркия ок атышпоо келишимин ишке ашыруу баскычтарына активдүү салым кошуп, колдоо көрсөтүүнү улантарын дагы бир жолу ырастайт” деп айтылды.

Трамптын тынчтык планы

АКШнын президенти Дональд Трамп Израиль менен ХАМАСтын АКШ сунуштаган Газа келишиминин биринчи этабын кабыл алганын жарыялады.

29-сентябрда жарыяланган 20 пункттан турган планга бардык израилдик туткундарды палестиналык туткундарга алмаштыруу, ок атышууну токтотуу, ХАМАСты куралсыздандыруу жана Газаны калыбына келтирүү кирет.

2023-жылдын октябрынан бери Израилдин чабуулдары Газада 67,200гө жакын палестиналыктын өмүрүн алды, алардын көбү аялдар жана балдар.

Тынымсыз бомбалоолор Газаны жашоого жараксыз абалга алып келип, кеңири ачарчылык жана ооруларга себеп болду.