Трамп башкаруусу тарабынан ишке ашырылган өз ара тарифтердин таасирин сезген Испания жана Вьетнам АКШга кире турган Вьетнам товарларына жасала турган 46 пайыз жана Европа Биримдигинин продукцияларына киргизе турган 25 пайыздык тарифтерге каршы дипломатиялык аракеттерин күчөттү.
Вьетнамдын премьер-министри Фам Мин Чинь Испаниянын премьер-министри Педро Санчестин Ханойго визити учурунда жасаган билдирүүсүндө Вьетнамдын Испания менен болгон карым - катнаштарды кыска убакытта "көп тараптуу стратегиялык өнөктөштүктүн» деңгээлине чыгарууну каалагандыгын белгиледи.
“Учурдагы глобалдык абалга көңүл бурулганда кыйынчылыктар жана кризистер канчалык күч алса ошончолук көп кызматташуу түзүү керек жана көп тараптуулукту баса белгилегибиз келет”,- деген Чинь биргелешкен пресс жыйынында эл аралык тилектештикке чакырык салды.
Санчес Испаниянын экономикалык ачыктыкка ишенгендигин жана соода согуштарына каршы экендигин айтып : “Испания эрежелерге негизделген эл аралык тартипти, эркин соода жана экономикалык ачыктыкты колдоп жатат. Соода согуштарынын эч кимге пайдасы жок, баарына зыян алып келет”,- деди.
Санчес Испаниянын Вьетнамда өзгөчө темир жол инфраструктурасы тармагында кеңейтүүнү каалай тургандыгын баса белгиледи. Өлкөсүнүн жогорку ылдамдыктагы поезд долбоорлорундагы тажрыйбаларын Вьетнам менен бөлүшө аларын айтты.
Вьетнам начар болгон темир жол системасына инвестицияларды көбөйтүүгө аракет кылууда. Бул алкакта борбор шаар Ханой менен Хо Ши Мин шаарын бириктирген 1541 километрдик жогорку ылдамдыктагы поезд линиясы жана Кытайга байланыштырган темир жол долбоорлору күн тартибинде.
