Ишемби күнү түштө атактуу Браун университетинде куралчан адам эки кишини өлтүрүп, дагы сегизин оор абалда жарадар кылганын бийлик билдирди. Кол салуучу дагы деле изделип жаткандыктан, аймактагылардан көчөгө чыкпай, жашынып турууну суранып жатышат.
Провиденс, Род-Айленд шаарынын мэри Бретт Смайли маалымат жыйында: «Мен бүгүн түштөн кийин эки адамдын каза болгонун жана дагы сегиз адамдын абалы оор, бирок туруктуу экенин тастыктай алам»,-деди.
Окуя Ivy League деп аталган университеттин кампусунда, инженерия жана физика бөлүмдөрү жайгашкан Barus жана Holley имаратында болду.
Университеттин маалыматына караганда, ок атуу болгон учурда имаратта бир нече экзамендер өткөрүлүүгө пландаштырылган болчу.
Укук коргоо органдары шектүүнү толугу менен кара түстөгү кийим кийген эркек катары сүрөттөштү.
Полиция башчысы Тимоти О'Хара: «Биз бул шектүүнү табуу үчүн колдо бар бардык ресурстарды колдонуп жатабыз. Аймакта үйдөн чыкпай жашынып турууну талап кылган буйрук дагы деле күчүндө жана адамдардан муну абдан олуттуу кабыл алууну суранам. Сураныч, бул аймакка келбеңиздер»,-деп билдирди.
«Эшиктерди жаап, телефонду үнсүз кылып, жашынып туруңуздар»
Бийлик өкүлдөрү ошондой эле куралчан адам акыркы жолу имараттан чыгып бараткан учурда көрүнгөнүн, бирок курал табылганганы тууралуу маалымат жок экенин билдиришти.
Браун университети саат 4:22дө (2122 GMT) «Barus жана Holley инженерия имараттарынын жанында активдүү ок атуучу адам бар» деген өзгөчө эскертүү жиберген.
Алар эскертүүдө: «Эшиктерди жаап, телефонду үнсүз кылып, кийинки билдирүүгө чейин жашынып туруңуздар» деп жазышкан.
Укук коргоо органдары жана биринчи жардам берүүчүлөр окуя болгон жерге чукул барган, жергиликтүү WPRI телеканалы тротуарда кийим жана кан болгонун кабарлаган.
ФБРдин директору Каш Пател X (мурдагы Twitter) баракчасында агенттик «керектүү бардык мүмкүнчүлүктөрдү» камсыздап жатканын билдирди.
Алкоголь, түтүн, курал жана жардыруучу заттар боюнча бюронун (ATF) агенттери да окуяны иликтөө үчүн тартылган.
Студент Katie Sun Brown Daily Herald гезитине берген маегинде, ок атуу угулганда жанындагы башка имаратта окуп жатканын, андан кийин бардык жеке буюмдарын таштап жатаканасына чуркап кеткенин билдирген.
Ал: «Бул чындап эле коркунучтуу эле. Ок чыккан үндөр класстар жайгашкан жактан келип жаткандай сезилди»,-деп айтты.
АКШнын президенти Дональд Трампка ок атуу боюнча маалымат берилген. Ал: «Бул канчалык жаман нерсе» жана «азыр биз үчүн жалгыз жасай ала турганыбыз- жабыркагандардын айыгып кетиши үчүн тиленүү»,-деп айткан.
Бостонго жакын жайгашкан Провиденсте орун алган Браун университетинин орто эсеп менен 11000 студенти бар.
Бул ок атуу АКШдагы мектептерге жана кампустарга карата жасалган көптөгөн кол салуулардын катарында акыркысы болуп калды; өлкөдө куралды пайдаланууну оңой кылган шарттарды чектөө боюнча чаралар саясий тоскоолдукка дуушар болууда.
