Кытай АКШ менен Японияны жакында Япониянын батышындагы америкалык аскер базасына биргелешкен машыгуулар үчүн жайгаштырылган «Typhon» ракеталык системасын аймактан чыгарып кетүүгө чакырды.

Кытайдын Тышкы иштер министрлигинин басма сөз катчысы Линь Цзянь Бээжиндеги маалымат жыйынында «АКШ менен Япония башка өлкөлөрдүн коопсуздук тынчсызданууларын чындап сыйлап, аймактык тынчтык жана туруктуулук үчүн конкреттүү кадамдар менен оң роль ойношу керек, тескерисинче эмес», – деп билдирди.

Кытайдын реакциясы АКШ «Томагавк» канаттуу ракеталарын атууга жөндөмдүү орто аралыкка учуучу ракеталык системасын Ямагучи префектурасынын Ивакуни шаарындагы АКШнын деңиз жөө аскерлеринин базасына жайгаштыргандан кийин болду.

Пекин Вашингтон менен Токиону “аймактык өлкөлөрдүн чакырыгына кулак салып, бул жаңылыштыкты оңдоого жана системаны мүмкүн болушунча тезирээк чыгарып кетүүгө» чакырды. «Япониянын милитаристтик агрессия тарыхынан улам аскердик жана коопсуздук кадамдары дайыма Азиядагы коңшуларынын жана эл аралык коомчулуктун көңүлүн бурат», – деп кошумчалады Линь.

Бул система 11-сентябрда башталган жана эки жумага созула турган АКШ менен Япониянын ортосундагы жылдык эки тараптуу Resolute Dragon аскердик машыгуусунда биринчи жолу колдонулат.

Экинчи Дүйнөлүк согуштан бери Азия-Тынч океан аймагында АКШнын узак мөөнөттүү союздашы болгон Япония акыркы жылдары Кытайдын аскердик күчүнүн жана аймактагы таасиринин өсүшүнө жооп катары өзүнүн коргонуу жөндөмдүүлүгүн бир топ жогорулатты.

Мындан тышкары, өлкөдө миңдеген америкалык аскерлер, аскердик базалар жана курал-жарактар жайгаштырылган.