Түркия Республикасынын Тышкы иштер министрлиги геноцид жүргүзгөн Израилдин Газзага карата кол салуулары боюнча билдирүү жасады.
Министрликтен берилген билдирүүдө төмөнкүдөй сөздөр орун алды:
“Газза Тынчтык планын ишке ашырууну мүмкүн кылчу жол картасына макулдашууга жетишилгенден кийин дароо эле Израиль Газзада 30дан ашык жаранды өлтүрүп, саламаттык сактоо мекемелерин бутага алгандыгы Нетаньяху өкмөтүнүн Палестиналыктар менен тынчтык курууга ниети жок экенин дагы бир жолу көрсөттү.
Нетаньяхунун жалгыз максаты - палестиналыктарды өз мекенинен сүрүп чыгаруу жана аймакта тынчтыкты жана туруктуулукту орнотууга тоскоолдук кылуу. Бул жагынан алганда, ал аймактагы морт тең салмактуулукту бузуп, ортомчу өлкөлөрдүн, биринчи кезекте АКШнын аракеттерин жокко чыгара турган кадамдарды жасоодон тартынбайт.
Эл аралык коомчулук Нетаньяхунун бүтүндөй Жакынкы Чыгышты чыр-чатак аймагына айландырууну көздөгөн экспансионисттик жана милитаристтик мамилесине каршы чечкиндүү, ырааттуу жана күчтүү позицияны ээлеши зарыл болуп калды.
Биз аймагыбыздын жана Палестинанын тынчтыгын жана гүлдөп-өнүгүшүн колдогон бардык өлкөлөрдү биргелешкен жоопкерчилик сезими менен иш-аракет кылууга жана эл аралык укукту жана гуманитардык баалуулуктарды сактоого чакырабыз".
