Ак үй АКШнын президенти Дональд Трамп Кремлдин чыгыш европалык коңшусуна каршы согушту токтотуу аракетинин алкагында орус жана украиналык кесиптештери менен жолугушууга ачык экенин билдирди.

“Президент эгер ушундай абалга келе турган болсо даяр экенин айтты, бирок ал эки лидердин жана эки тараптын тең бир үстөлгө отуруп сүйлөшүүсүн каалайт”, – деп билдирди Ак үйдүн өкүлү Каролайн Левитт дүйшөмбү күнү журналисттерге.

Бул билдирүү дүйшөмбү күнү Түркиянын президенти Режеп Таййип Эрдогандын үч өлкөнүн лидерлерин катыштырган саммит өткөрүү сунушунан кийин айтылды.

Министрлер кабинетинин жыйынынан кийин сүйлөгөн сөзүндө Эрдоган “эң чоң тилеги” орус президенти Владимир Путинди жана украин президенти Владимир Зеленскийди Стамбул же Анкарага жолугуштуруу экенин маалымдады.

Орусия жана Украинанын делегациялары Стамбулда сүйлөшүүнүн экинчи айлампасы үчүн жолугуп жаткан учурда билдирүү жасаган Эрдоган, ал тургай бул ысымдардын арасына Трампты да кошууну каалаганын айтты.

Эрдоган “Чындап эле сонун жолугушуу болду. Бул жолугушуунун натыйжасында, мурдагы туткун алмашууларга салыштырмалуу бул ирет туткун алмашуунун саны миңден ашты. Туткун алмашуудан тышкары, Орусия менен Украинадан айрым сөөктөрдүн кайтарылышы да болду. Бул сандар да абдан көп. Биз буга чындап сыймыктанабыз”, – деди.

Эрдоган эгерде лидерлер Түркияга чогулса "мен да бул жолугушууга катышып, Стамбулду тынчтыктын борборуна айландыруу үчүн аракет кылам" деп кошумчалады.