АКШнын президенти Дональд Трамп дүйшөмбү күнү Можтаба Хаменеинин Ирандын жаңы жогорку лидери болуп дайындалышына нааразычылыгын билдирип, дайындоону "чоң ката" деп сыпаттады.
"Канчага созуларын билбейм... Менимче, алар ката кетиришти", - деди Трамп NBC News каналына.
Буга чейин да АКШнын лидери New York Post гезитине бул тандоого "канааттандырарлык эмес" экенин айткан.
"Биздин макулдугубузду алышы керек", - деп кошумчалады Трамп.
The Wall Street Journal ошондой эле Трамп жеке сүйлөшүүлөрүндө жардамчыларына Хаменеи АКШнын талаптарын аткаруудан баш тартса, аны өлтүрүүгө даяр экенин айтканын жазган.
Гезит АКШнын азыркы жана мурдагы чиновниктерине шилтеме кылып, талаптардын катарына Ирандын өзөктүк программасын токтотуу киргенин билдирди. Гезит Ак үй бул маселе боюнча комментарий берүүдөн баш тартканын кошумчалады.
56 жаштагы Можтаба Хаменеи жекшемби күнү 1979-жылдагы революциядан берки Ирандын үчүнчү жогорку лидери болуп дайындалды. Ал 37 жыл бою ээлеп келген атасы Али Хаменеи 28-февралда АКШ-Израиль аба соккусунан каза болгондон кийин бул кызматка киришти.
Трамп ошондой эле Ирандын мунайын басып алуу планы бар экенин ачык айткан жок, бирок бул маселени талкуулоого али эрте экенин билдирди.
"Албетте, бул талкууланды", - деген Трамп, ушул жылдын башында Венесуэланын лидери Николас Мадурону кармагандан кийин АКШ 80 миллион баррелден ашык мунай алган Венесуэла мисалына токтолду.
Иранга байланыштуу: "Бул тууралуу сүйлөшүүгө али эрте", - деп кошумчалады.
