Казакстандын президенти Касым-Жомарт Токаев Германия менен жалпы суммасы 2 миллиард долларга жакын соода келишимдерине кол коюлганын билдирди.
Казакстан президенттигинин билдирүүсүнө ылайык, Германияга расмий сапар менен барган Токаев Берлинде Германиянын канцлери Фридрих Мерц менен жолугушту.
Жолугушууда тараптар Казакстан менен Германиянын ортосундагы көп кырдуу кызматташтыкты бекемдөөгө берилгендигин билдиришти.
Тараптар өнөр жай, маанилүү минералдар, транспорт жана логистика, санариптик технологиялар, машина куруу жана химия өнөр жайы сыяктуу жогорку кошумча нарк түзүлгөн тармактарда кызматташууну өнүктүрүү үчүн олуттуу мүмкүнчүлүктөр бар экенин белгилешти.
Мындан тышкары, тараптар эл аралык уюмдардын, биринчи кезекте «Борбордук Азия – Германия» форматынын алкагындагы кызматташтыкты күчөтүү боюнча макулдашышты.
30дан ашык соода келишимине кол коюлду
Токаев менен Мерц сүйлөшүүлөрдөн кийин биргелешкен маалымат жыйынын өткөрүштү.
Казакстандын президенти Токаев өз сөзүндө жалпысынан 2 миллиард долларга жакын 30дан ашык соода келишимине кол коюлганын жарыялады.
Бул келишимдерди натыйжалуу ишке ашыруу эки өлкөнүн ортосундагы кызматташтыкты андан ары бекемдей турганын баса белгилеген Токаев Германияга болгон сапарынын кийинки этабында Баварияга барып, жогорку мартабалуу жетекчилер менен жолугушаарын белгиледи.
Токаев өзгөчө сапарынын алкагында өтө турган Казакстан-Бавария технологиялык форумуна катышаарын да жарыялады.
Мерцти Казакстанга чакырды
Токаев сүйлөшүүлөрдүн жүрүшүндө аймактык жана глобалдык күн тартибиндеги окуяларды да талкуулаганын айтып, ар бир кагылышуунун тынчтык жана дипломатиялык жолдор менен чечилиши керектигин жана бул эки өлкөнүн жалпы позициясы экенин кошумчалады.
Тараптардын "Борбордук Азия-Германия" форматында диалогду өнүктүрүү боюнча да макулдашкандарын белгилеген Токаев Казакстандын Германия менен узак мөөнөттүү, өз ара пайдалуу жана натыйжага багытталган стратегиялык өнөктөштүктү чыңдоого умтулуп жатканын баса белгиледи.
Сүйлөшүүлөрдүн аягында Токаев Германиянын канцлери Мерцти Казакстанга чакырды.
Токаев ошондой эле Германиянын президенти Франк-Вальтер Штайнмайер менен жолугушуу өткөрдү.
