Тышкы иштер министри Хакан Фидан Сеулдагы жолугушуулардан кийин Түркия менен Түштүк Кореянын ар түрдүү тармактарда эки тараптуу кызматташтыкты тереңдетүүгө чечкиндүүлүктөрүн дагы бир жолу ырастаганын билдирди.
Бейшемби күнү X баракчасындагы бөлүшүүсүндө Фидан: «Биз соода карым-катнашыбызды өнүктүрүү жана өз ара инвестицияларды көбөйтүү боюнча орток эркибизди тастыктадык»,-деди.
Эки тараптын атомдук энергетика, транспорт, коргоо өнөр жайы жана алдыңкы технология сыяктуу стратегиялык секторлордо ишке ашырыла турган биргелешкен демилгелерди да талкуулаганын маалымдаган министр Фидан, жолугушууларда актуалдуу аймактык жана глобалдык маселелер, өзгөчө Азия-Тынч океан жана Жакынкы Чыгыштагы жагдайлар тууралуу кеңири пикир алмашуу болгонун айтты.
Фидан эки өлкөнүн Бириккен Улуттар Уюму, MIKTA (Мексика, Индонезия, Түштүк Корея, Түркия жана Австралиянын расмий эмес шериктештиги) жана G20 сыяктуу эл аралык платформалардагы тыгыз кызматташтыгынын маанилүүлүгүн дагы бир жолу тастыктаганына көңүл буруп, Корея университетинде сүйлөгөн сөзүндө болсо эл аралык системанын алдында турган кыйынчылыктарга жана глобалдык системанын келечегине баа берүү менен Түркиянын өз көз карашын ортого салганын баса белгиледи.
Фидан ошондой эле билдирүүсүндө: «Шейиттерибиздин жана ардагерлерибиздин урматтуу элеси эки өлкөнүн түбөлүк достугунун белгиси катары келечек муундарды шыктандырат. Алдыдагы мезгилде Түркия менен Корея Республикасынын ортосундагы стратегиялык өнөктөштүктү өз ара пайданын негизинде тереңдетүүнү улантабыз»,-деди.
