Израиль жакынкы күндөрдө Иранга кол салууга даярданып жатат, бирок АКШ Тель-Авивге Израилдин Ирандын өзөктүк объектилерине кандайдыр бир чабуулуна катышпай турганын маалымдады.
Президент Дональд Трамптын администрациясы Израиль өкмөтүнө АКШ Ирандын ядролук объектилерине карай кандайдыр бир Израилдин аскердик чабуулуна түздөн-түз катышпай турганын айтты. Бул тууралуу Axios бейшемби күнү эки америкалык жана бир израилдик булактарга таянып кабарлады.
Ал арада АКШ менен Израилдин кызматкерлери Wall Street Journal гезитине эгер Иран потенциалдуу атомдук бомба үчүн бөлүнүүчү материалдарды өндүрүүнү токтотпосо, жекшембиге чейин чабуул болоорун айтышты.
Бул эскертүү АКШнын атайын өкүлү Стив Виткофф жекшемби күнү Омандын борбору Маскатта ирандык өкүлдөр менен алтынчы айлампа сүйлөшүүлөрүн өткөрүүгө даярданып жаткан учурда айтылды.
Израилдин премьер-министри Биньямин Нетаньяху дүйшөмбү күнү Трамп менен телефон аркылуу сүйлөшкөндө кол салуу ыктымалдыгын айтканын WSJ эки америкалык аткаминерге шилтеме кылып билдирди.
Трамп "дипломатиялык жол менен чечүүгө даяр"
Ошол эле учурда Трамп бейшемби күнү АКШ Ирандын өзөктүк маселесин дипломатиялык жол менен чечүүгө ынтызар экенин, бирок Тегеран адегенде өзөктүк курал жасоо үмүтүнөн баш тартышы керектигин айтты.
Трамп Truth Social баракчасына: "Биз Ирандын өзөктүк маселесин дипломатиялык жол менен чечүүгө чечкиндүүбүз!" деп жазды.
"Менин администрациям толугу менен Иран менен сүйлөшүүлөрдү жүргүзүүгө багытталды. Алар улуу өлкө боло алышат, бирок биринчи кезекте ядролук куралга ээ болуу үмүтүнөн толугу менен баш тартуулары керек," деп кошумчалады.
Иран өзүнүн ядролук программасы тынчтык максатта экенин айтып, чабуул жасалса жооп кайтарууга даяр экенин билдирди. Ошондой эле, өзөктүк милдеттенмелерин аткара алган жок деген айыптоолордон улам уранды байытуу боюнча үчүнчү ишкана ачарын жарыялады.
Бул чыңалуу бейшемби күнү БУУнун ядролук көзөмөл агенттигинин башкаруу кеңеши Иранды 20 жылдан бери биринчи жолу ядролук милдеттенмелерин бузду деп расмий айыптагандан кийин күчөдү.
Иран МАГАТЭнин резолюциясын "Кеңештин техникалык же укуктук негиздери жок саясий максаттар үчүн колдонулушу" деп айыптады.
Бул резолюция 2015-жылдагы Иран ядролук келишимине кол койгон үч европалык мамлекет — Германия, Франция жана Улуу Британия тарабынан сунушталып, АКШ тарабынан колдоого алынган.
МАГАТЭнин резолюциясы Тегеран менен Вашингтондун ортосундагы Оман аркылуу жүргүзүлүп жаткан кыйыр ядролук сүйлөшүүлөрдүн алкагында кабыл алынды.
Кийинки сүйлөшүү раунду жекшемби күнү Омандын борбору Маскатта өтөт деп пландалууда.
Негизги талаштуу маселе Ирандын уран байытуу программасы бойдон калууда.
АКШ уран байытууну толугу менен токтотууну талап кылса, ирандык сүйлөшүүчүлөр бул программа талкууланбай турганын жана келишим болобу же жокпу улантыла берерин баса белгилешүүдө.
