Түркиянын Коммуникация башкармалыгынын башчысы Бурханеттин Дуран шейшемби күнү кол салуулардын экинчи жылында 67 миңден ашуун адамдын өмүрүн алган окуяларды эскерүү билдирүүсүндө, Израилдин Газадагы аракеттерин системалуу геноцид жана басып алуу чындыгы деп сыпаттады.

Түркиянын NSosyal социалдык медиа платформасындагы билдирүүсүндө Дуран бул кырдаалды “Палестина элинин гана трагедиясы эмес, эл аралык тартипти, мыйзам үстөмдүгүн жана негизги адамдык баалуулуктарды суроо алдында койгон уяттуу окуя” деп мүнөздөдү. Дуран ошондой эле эл аралык коомчулуктун унчукпай калышы адилеттик механизмдердин кыйраганын дагы бир жолу ачыкка чыгарганын белгиледи.

Дуран шейшемби күнү Израилдин Газага карата 2023-жылдын 7-октябрында баштаган кол салууларынын жана андан кийинки геноциддин экинчи жылдыгы экенин эске салып: “Бомбалоолор, блокадалар жана системалуу кыйратуу миңдеген жай тургундардын, анын ичинде аялдар менен балдардын өмүрүн алды. Дүйнөнүн көз алдында бир эл өз жеринен жана эң негизги укуктарынан ажыратылды. Газадагы болуп жаткандар ‘жаңжал’ эмес; системалуу түрдө жүргүзүлгөн геноцид жана оккупация чындыгы болуп саналат” деди.

Дуран Түркиянын бул чындыкты башынан бери ачык айтканын, адилеттүүлүктүн, адамдык ар-намыстын жана эзилгендердин жанында турганын белгилеп “Президент Режеп Таййип Эрдогандын жетекчилигинде дипломатиялык платформаларда да, гуманитардык жардам жаатында да бул позиция чечкиндүү түрдө уланып жатат. Палестиналыктардын үнү угулуп, адилеттик орногонго чейин ушул күрөш уланат»,-деп кошумчалады.

Дуран ошондой эле аймакта уланып жаткан гуманитардык кризиске багытталган «Бүтпөгөн геноцид: Газа» аттуу видеону да бөлүштү.