Кытай менен АКШнын жогорку даражалуу өкүлдөрү жекшемби күнү Малайзияда соода сүйлөшүүлөрүнүн экинчи күнүнө чогулушту. Бул учурда АКШ президенти Дональд Трамп үч өлкөнү камтыган Азия турнесин баштап, Кытайдын президенти Си Цзиньпин менен жолугушууга даярданууда.
Дүйнөдөгү эң ири эки экономика ортосундагы акыркы сүйлөшүүлөр ишемби күнү башталган. Бул сүйлөшүүлөр Түштүк-Чыгыш Азия Улуттары Ассоциациясынын (ASEAN) саммитинин алдында өттү. Саммит жекшемби күнү Куала-Лумпурда ачылды.
Кытай делегациясын вице-премьер Хэ Лифэн жетектеп жатат, ал эми АКШ делегациясын Каржы министри Скотт Бессент баштоодо.
Бул жолугушуу эки тараптын бешинчи жолу сүйлөшүүсү болуп саналат. Буга чейин жогорку даражалуу өкүлдөр Женевада, Лондондо, Стокгольмдо жана Мадридде жолугушкан.
АКШнын соода өкүлү Жеймисон Грир Куала-Лумпурда журналисттерге берген маалыматында эки тарап лидерлерге сунуштоо үчүн макулдашууга жакындап калганын билдирди.
Август айында АКШ менен Кытай тарифтер боюнча убактылуу келишимге жетишкен. Бул келишим 10-ноябрга чейин күчүндө болот. Буга чейин Трамп тарифтерди 145 пайызга чейин көтөрүп, кийин кайра төмөндөтүп койгон. Кытай болсо АКШ товарларына тарифтерди 125 пайызга чейин көтөргөн эле.
“Биз келишимди узартуу, сейрек кездешүүчү металлдар жана башка көптөгөн темалар боюнча сүйлөштүк. Менимче, лидерлердин алдыдагы жумада өтө турган жолугушуусу жемиштүү болот,” – деп Грир өзүнүн билдирүүсүндө айтты.
Ишемби күнү эки тарап беш сааттан ашык убакыт бою сүйлөшүүлөрдү жүргүзүштү.
Трамп Си менен Түштүк Кореяда жолугат
Трамп Куала-Лумпурга ASEAN саммити башталган учурда келди. Ал Түштүк-Чыгыш Азиядагы бул өлкөгө келген үчүнчү АКШ президенти болуп калды. Биринчи жолу 1966-жылы Линдон Б. Жонсон бул өлкөгө барган.
Трампты Малайзиянын премьер-министри Анвар Ибрагим тосуп алды. Андан кийин экөө Куала-Лумпур Конвенция Борборуна барып, АКШ менен Малайзиянын ортосундагы жолугушууларга жана саммитке катышышты.
Трамп жана Анвар Камбоджа менен Таиланддын ортосундагы тынчтык келишимине кол коюу аземине да күбө болушту. Бул эки өлкө июль айында чек ара жаңжалдарына кабылган эле.
Малайзия ASEAN саммитин жекшембиден шейшембиге чейин өткөрүүдө.
Кытай менен АКШнын жогорку даражалуу соода өкүлдөрүнүн жолугушуусу Трамптын Си менен Түштүк Кореядагы жолугушуусунун алдында өтүүдө. Бул жерде дүйнөдөгү эң ири экономикалардын лидерлери Азия-Тынч океан экономикалык кызматташтык форумунун саммитине катышат.
Трамп Малайзияга бара жаткан учурунда журналисттерге Си менен “көп нерселерди талкуулай турганын” айтты.
“Алар айрым жеңилдиктерди бериши керек. Биз да, балким, ошондой кылабыз. Биз алар үчүн тарифтерди 157 пайызга көтөрдүк. Бул алар үчүн туруктуу эмес деп ойлойм жана алар аны төмөндөтүүнү каалашат. Биз болсо алардан айрым нерселерди талап кылабыз,” – деп Трамп Азияга сапары учурунда билдирди.
Түштүк Корея менен тарифтик келишим тууралуу Трамп “ал дээрлик аяктап калды” деп айтты, деп Bloomberg News маалымдады.
