Түркиянын автобус, жүк ташуучу унаа жана брондолгон аскердик унааларды чыгаруучу алдыңкы өнөр жай компанияларынын бири болгон Otokar аскердик унааларды жеткирүү боюнча жаңы экспорттук келишимге кол коюлганын Коомдук ачыктоо платформасында (KAP) жарыялады.
Жарыяда компания ар кандай типтеги дөңгөлөктүү брондолгон унааларды жеткирүүнү жана бул унаалар үчүн интеграцияланган логистикалык колдоо кызматтарын камтыган 1 472 080 360 долларлык экспорттук келишимге кол койгону маалымдалды.
Келишим зарыл болгон расмий бекитүүлөрдү алгандан, кепилдик катынын жол-жоболорун аяктагандан жана алдын ала төлөмдү жүргүзгөндөн кийин күчүнө кирери айтылды. Ошондой эле компания кардарга келишим боюнча милдеттенмелерин жана ала турган алдын ала төлөмдү камсыз кылуу үчүн жалпысынан 441 624 108 долларлык кепилдик каттарын берери кабарланды.
Жарыяда унааларды жеткирүү 2027-жылы башталып, 3 жылдын ичинде этап-этабы менен аякташы жана келишим 7 жыл бою күчүндө болору билдирилди.
