Индонезиянын тышкы иштер министри шейшемби күнү ирандык кесиптешине Жакартанын Иран, АКШ жана Израилдин ортосундагы күчөп бараткан жаңжалда ортомчулук кылууга даяр экенин билдирди.
Индонезиянын тышкы иштер министри Сугионо Жакынкы Чыгыштагы чыңалуу күчөп жаткан маалда Ирандын тышкы иштер министри Аббас Арагчи менен телефон аркылуу сүйлөштү.
X платформасындагы билдирүүсүндө Сугионо: "Индонезия тынчтыкты алдыга жылдырууда конструктивдүү ролду ойноого даяр; бул контекстте биз чыңалуунун андан ары күчөшүнө жана бейкүнөө адамдардын керексиз өлүмүнө жол бербөө максатында диалогго же ортомчулукка көмөктөшүүгө даяр экенибизди билдиребиз", - деди.
Бардык тараптарды максималдуу сабырдуулукка жана чыңалууну басаңдатуу үчүн тезинен чараларды көрүүгө чакырган министр эл аралык укукту жана БУУнун Уставын сыйлоонун зарылдыгын баса белгилеп, диалог жана дипломатия аймактык туруктуулукка алып баруучу жалгыз жол экенин кошумчалады.
"Трагедиялуу бутага алуу"
Дүйшөмбү күнү Аракчи Ооганстандын убактылуу тышкы иштер министри молдо Амир Хан Моттаки менен да аймактык кырдаалды талкуулоо үчүн жолугушту.
Ооганстандын Тышкы иштер министрлигинин билдирүүсүнө ылайык, Моттаки кырдаалга "терең тынчсыздануусун" билдирип, АКШ менен Израилдин Иранга жасаган чабуулдарын айыптады.
Моттаки ошондой эле Ирандын Жогорку лидери Али Хаменеинин "трагедиялуу бутага алынышына" байланыштуу көңүл айтты.
Ишембиден бери АКШ менен Израилдин биргелешкен чабуулдарында бир нече жогорку даражалуу Иран чиновниктери каза болгону кабарланган.
Тегеран Перс булуңундагы мамлекеттердеги АКШга караштуу объектилерди дрондор жана ракеталар менен бутага алуу менен жооп кайтарды.
АКШнын алты кызматкери каза болуп, дагы бир нечеси оор жаракат алды.
Ирандын Кызыл Жарым Ай коомунун маалыматына караганда, ишембиден бери АКШ менен Израилдин аба соккуларынан каза болгондордун саны 555ке жетти.
