Кытай Коммунисттик партиясынын (ККП) жогорку кызматтагы өкүлдөрү бейшемби күнү заманбап өнөр жай системасын куруу жана технологиялык жактан өзүн-өзү камсыздоого жетүү боюнча күч-аракеттерди күчөтүүгө убада беришти. Бул кадамдар Кытайдын АКШ менен барган сайын күчөп бараткан глобалдык атаандаштыгындагы Азия өлкөсүнүн позициясын бекемдөө үчүн абдан маанилүү болуп эсептелет.
Партиянын Борбордук комитети ички суроо-талапты жогорулатуу жана коомдук жыргалчылыкты жакшыртуу боюнча күч-аракеттерди жасоого убада берди. Акыркы жылдары Кытай өндүрүшкө жана инвестицияга артыкчылык бергендиктен, бул узак мөөнөттүү максаттар көбүнчө четке кагылды.
Вашингтон менен соода чыңалуулары күчөгөндүкктөн, Кытай экономикасынын экспортко катуу көз карандылыгы Пекинди алдыдагы жылдары дагы жакшы саясий тең салмактуулукту табууга түртүшү мүмкүн. Бирок, эксперттер бул аракеттердин жай жүрүп жатканын божомолдошууда.
Синхуа мамлекеттик маалымат агенттигинин маалыматы боюнча, партия лидерлери тарабынан төрт күндүк жабык жыйындардан (пленумдардан) кийин жарыяланган билдирүүдө Кытайдын 15-беш жылдык өнүгүү планынын артыкчылыктары белгиленди. Бул пландын толук тексти март айындагы парламенттик сессияда жарыяланат.
Синьхуадан алынган маалыматта :«Өлкө стратегиялык мүмкүнчүлүктөр тобокелдиктер жана кыйынчылыктар менен бирге боло турган, белгисиз жана күтүүсүз факторлор көбөйө турган мезгилге (2026-2030) кирет. Биз өндүрүш тармагынын ылайыктуу катнашын сактап, өнүккөн өндүрүштү өзүнүн негизи катары кабыл алган заманбап өнөр жай системасын курушубуз керек», - деп айтылат.
Билдирүүдө Пекиндин коомдук жыргалчылыкты жана социалдык камсыздоо системасын жакшыртууга аракет кылары белгиленди. Бирок, бул максаттарга кантип жетишилери же каражаттар кайдан алынары тууралуу маалымат берилген эмес.
Мындай саясаттардын убактысы, ылдамдыгы, каржылоо булактары жана көлөмү боюнча белгисиздик экономисттер менен инвесторлорду Кытай өкмөтүнүн экономикасын кайра тең салмактоого жөндөмдүүлүгү тууралуу тынчсыздандырышы мүмкүн. Учурда үй чарбаларынын керектөөсү дүйнөлүк орточо көрсөткүчтөрдөн ИДПнын 20 пайыздык пунктуна артта калууда.
