АКШнын президенти Дональд Трамп өлкөсү менен Израилдин Иранга каршы согушу "дээрлик бүткөнүн" айтты.

Шаршемби күнү көрсөтүлө турган маекте Трамп Fox Business алып баруучусу Мария Бартиромонун согуш "бүттүбү" деген суроосуна: "Менимче, ал дээрлик бүттү, ооба. Менин оюмча, абдан жакын", - деп жооп берди.

Маектешүүдөн үзүндү X баракчасында бөлүшүлдү.

Трамп: "Карагылачы, эгер мен азыр чегинсем, ал өлкөнү кайра куруу үчүн аларга 20 жыл керек болот, ал эми биз али бүтө элекпиз. Эмне болорун көрөбүз. Менимче алар келишим түзгүсү келет, чындап эле каалашат" деп кошумчалады.

Буга чейин Бартиромо Instagramда бөлүшүлгөн видеодо маектешүү учурунда Трамптын Иран согушу жөнүндө жалаң өткөн чактан сөз кылганын, ошондуктан ал түз эле: "Бүттүбү?" деп сураганын айтты.

АКШ менен Израилдин Иранга каршы 28-февралда баштаган согушту биротоло токтотуу боюнча Пакистандын Исламабад шаарында дем алыш күндөрү сүйлөшүүлөр өткөрүлдү, бирок эч кандай макулдашууга жетишилген жок.

Сүйлөшүүлөрдүн дагы бир айлампасын уюштуруу аракеттери көрүлүүдө.

Трамп АКШ менен Ирандын ортосундагы түз сүйлөшүүлөрдүн кайра башталышы мүмкүнчүлүгүнө карата оптимисттик маанайда болуп, шейшемби күнү бул сүйлөшүүлөр Пакистанда эки күндүн ичинде кайра башталышы мүмкүн экенин билдирди.

Пакистан 8-апрелде тараптардын ортосунда дагы деле уланып жаткан эки жумалык ок ​​атышууну токтотууга ортомчулук кылды.