Даниянын тышкы иштер министри Ларс Лёкке Расмуссен жума күнү Арктикадагы коопсуздукту арттыруу үчүн Гренландия темасында АКШ менен сүйлөшүүлөр жакында башталат деп күтүлүп жатканын билдирди.
Жума күнү Копенгагенде журналисттерге маалымат берген Расмуссен: "Биз бул жыйындарды жакында баштайбыз. Бирок процесстин айланасындагы чыңалууну азайтуу үчүн сүйлөшүүлөрдүн убактысын азырынча бөлүшпөйбүз", - деди. Сүйлөшүүлөрдүн негизги багыты "коопсуздук, коопсуздук жана коопсуздук" болорун баса белгиледи.
Ал арада НАТОнун лидери Марк Рютте жана Даниянын премьер-министри Метте Фредериксен жума күнү АКШнын президенти Дональд Трамп Гренландияны басып алуу боюнча коркутууларынан баш тарткандан кийин альянс Арктиканын коопсуздугу боюнча аракеттерин күчөтүшү керек деген пикирге келишти.
Рютте Брюсселде Фредериксен менен жолугушуусунан кийин X баракчасына жазган билдирүүсүндө: "Биз бүтүндөй НАТОнун коопсуздугун камсыз кылуу максатында биргелешип иштеп жатабыз жана Арктикада коргонууну күчтөндүрүү үчүн кызматташтыгыбызды бекемдейбиз", - деп билдирди. Рюттенин ушул аптада Давосто Трамп менен Гренландия темасында макулдашууга жетишкени айтылганы менен, келишимдин чоо-жайы ачыкка чыга элек.
Бир тараптан Трамп коркутууларынан баш тарткандан кийин Фредериксендин Гренландиянын борбору Нуукка барып кесиптеши менен жолугары күтүлүүдө. Фредериксен өзүнүн X баракчасында Брюсселден Нуук шаарына бара турганын мааалымдады.
