Масуд Пезешкиан: Иран ашыкча талаптарга баш ийбейт
Иран президентинин билдирүүлөрү өлкө 1979-жылдагы ислам революциясынын 47 жылдыгын белгилеп жаткан учурда жасалды.
Ирандын президенти Масуд Пезешкиан Тегеран Америка Кошмо Штаттары менен сүйлөшүүлөрдү кайрадан баштагандан кийин, өлкөсүнүн атомдук программасына байланыштуу «ашыкча талаптарга моюн сунбай турганын» билдирди.
Шаршемби күнү ошондой эле Иран өзүнүн ядролук программасы боюнча «бардык текшерүүлөргө» даяр экенин айтып, атом бомбасына ээ болууну көздөбөгөндүгүн ортого салды.
Иран менен АКШ өткөн жылдын июнь айында Израиль менен болгон жана АКШ Ирандагы өзөктүк объекттерге сокку урган согуштан кийин, өткөн аптада биринчи жолу сүйлөшүүлөрдү кайрадан башташты.
Пезешкиан: «Иран агрессиянын алдында моюн сунбайт; бирок аймакта тынчтыктын жана бейпилдиктин орношу үчүн кошуна өлкөлөр менен болгон күчүбүз менен диалогду улантып жатабыз», — деди.
Борбор шаар Тегерандагы Азади аянтында 1979-жылдагы Ислам революциясынын 47 жылдыгына карата уюштурулган иш-чарада сөз сүйлөгөн Ирандын президенти Масуд Пезешкиан: «Өлкөбүз Иран алардын ашыкча талаптарына моюн сунбайт», — деген пикирин билдирди.
Иран сүйлөшүүлөрдүн атомдук программа менен гана чектелишин кааласа, АКШ болсо Ирандын баллистикалык ракета программасын жана аймактагы кээ бир топторго берген колдоосун да күн тартибине киргизүүнү талап кылууда.
Иран атомдук программасынын тынчтык максатында экендигин жактап келет; бирок АКШ жана өнөктөшү Израиль Тегерандын атомдук куралга ээ болууга аракет кылып жаткандыгын айтууда.
Жыл сайын Иран башкаруусунун колдоочулары 1979-жылы АКШ колдогон шахтын кулатылышы менен жыйынтыкталган төңкөрүштү массалык иш - чаралар менен эскеришет.
Шаршемби күнү Азади аянтында коопсуздук чаралары мурунку жылдарга салыштырмалуу катуу экендиги байкалды.
Өткөн айда Иранда өлкө боюнча нааразычылык толкуну болуп, демонстрациялар күч менен бастырылган жана АКШ демонстранттарды колдоо максатында аскердик кадамдар менен коркуткан.