АКШда жеке учак кырсыкка учурады, каза болгондор бар
Каза болгондордун арасында NASCAR жарышчысынын мурдагы айдоочусу Грег Биффл, аялы жана эки баласы бар.
Жетекчилердин маалыматына караганда, Түндүк Каролинада жеке учак кырсыгында жети адам, анын ичинде мурдагы жарыш айдоочусу каза болду.
"Учакта жети адам болгон, баары каза тапты", - деди аймактын башчысы Даррен Кэмпбелл бейшемби күнү AFP агенттигине.
Түндүк Каролина штатынын жол кайгуул кызматынын маалыматына караганда, учак учуп-конуу тилкесине кайра кайтып келүүгө аракет кылып жатканда кулап түшкөн.
Учак Шарлоттанын түндүгүндөгү Стейтсвилл аэропортунан учуп чыккан.
Үй-бүлөнүн досу, республикачыл эл өкүлү Ричард Хадсондун айтымында, каза болгондордун арасында NASCARдын мурдагы айдоочусу Грег Биффл, анын аялы Кристина Гроссу Биффл жана алардын эки баласы бар.
Хадсон кырсыктан кийин социалдык медиадагы билдирүүсүндө: "Грегдин, Кристинанын жана алардын балдарынын өлүмү мени терең кайгыга салды. Алар башкаларга жардам берүүгө өмүрүн арнаган достор болчу", - деп жазды.
Улуттук транспорт коопсуздугу кеңеши кырсыкты иликтөө үчүн топ дайындай турганын кабарлады.
20 жылдык карьерасында 19 Cum Series жарышында жеңишке жеткен Грег Биффл кийинки жумада 56 жашка чыкмак.
Акыркы жарышын 2022-жылы Талладегадагы Geico 500 мелдешинде өткөргөн Биффл NASCARдын 2023-жылдагы 75 эң мыкты айдоочусунун бири деп табылган.
Ошондой эле тик учактын ээси жана учкучу болгон Грег Биффл 2024-жылдын сентябрь айында “Хелен” бороонунда Түндүк Каролинанын батышындагы адамдарга жардам аракеттерине тик учак менен колдоо көрсөткөн.