Президент жана АК партиянын төрагасы Эрдоган, партиясынын фракция жыйынында сүйлөгөн сөзүндө төмөнкүлөргө токтолду;

"Сиздер да жакындан байкап жатканыңыздай, дүйнө жаңы жана радикалдуу өзгөрүүнүн босогосунда болуу азабын башынан кечирүүдө. Анын сыңарындай, түндүк жана түштүк аймактарыбыз согуштардан, кагылышуулардан, кыргындардан жана зулумдардан жапа чегүүдө. Мындай кырдаалда Элдик альянс катары алдыбызда тарыхый жоопкерчилик турат. Түркиянын саясий жана экономикалык ырааттуулугун коргоо, коомдук тынчтыкты чыңдоо жана максаттарыбызга карай жүрүш үчүн күрөшүп жатабыз.

"Коомчулукту кучагына алган саясат менен кызмат кылуудабыз"

Негизи биз туш болгон көрүнүш АК партия жана Элдик альянс менен гана чектелип калбагыдай өтө маанилүү. Саясий чөйрөдө кайсыл жерде турбасын, бул өлкөнүн жана бул элдин алдында жоопкерчилигин сезген ар бир адам ушул күрөшкө колдоо көрсөтүп, салым кошуусу, жок дегенде деструктивдүү оппозициядан алыс болушу керек. Белгилүү болгондой дүйнөнүн көптөгөн өлкөлөрүндө бийликтеби же оппозициядабы, айтор улуттук маселелерде бирдиктүү позиция карманып келет. Жеке биз да муну жарым кылымга жакын саясий өмүрүбүздө коргоп келдик. Бөлгөн эмес бириктирген, уюлдаштырбай кучактаган, коомдун бардык катмарын жалпы баалуулуктардын айланасына чогултууга аракет кылган саясат стили менен өлкөбүзгө кызмат кылууга аракет кылдык.

Көбүнчө маектештерибизден каалаган мамилени көрбөсөк да бир туугандык, иш алып баруу, кызмат кылуу саясатыбыздан баш тарткан жокпуз. Мекенибизде гана эмес, аймагыбыздан баштап бүткүл дүйнөдө тынчтык, бейпилдик, адилеттүүлүк, кызматташтык духу өкүм сүрүшү үчүн күнү-түнү иштеп жатабыз. Түркия глобалдык саясаттын уюлдарынын бири катары ролун күндөн-күнгө күчтөндүрүүдө. Орусия-Украина согушу жана Газа кыргыны менен бирге географиябыздагы бардык кризистерди чечүү үчүн катуу аракет кылып жатабыз. Израиль менен Ливандын ортосунда күчүнө кирген ок атышпоо келишимине ыраазыбыз. Тынчтыкты сактоо темасында бардык тараптардын, өзгөчө Израилдин өз милдеттерин так аткаруусун күтөбүз. Түркия катары Газадагы кыргынды токтотуу жана туруктуу ок атышпоо үчүн ар кандай салым кошууга даяр экенибизди билдиргим келет.

«Артыкчылыгыбыз – улут, максатыбыз – улуу Түркия»

Биз бул дипломатиялык кадамдардын баарын өзүбүздүн саясий өздүгүбүз менен эмес, баарынан мурда ушул өлкөнүн, улуттун инсандары катары жасап жатабыз. Ар дайым мүчөсү болгонубузга сыймыктанган сүйүктүү улутубузга эң жакшы кызмат кылууну ойлойбуз. Эзилгендердин жана жабыр тарткандардын үмүтү болгон Түркия Республикасын ар тармакта өнүктүрүп, күчтүү, гүлдөгөн, кадыр-барктуу, ийгиликтүү өлкөгө айландырууну көздөп жатабыз. Артыкчылыгыбыз – улут, максатыбыз – улуу Түркия. Биз Түркия кылымын куруп жатканыбыз менен сыймыктанабыз жана толкунданабыз. Убада бердик, аткарып жатабыз. Кажыбас ишеним менен максатыбызга багыт алдык. Аллахтын ырайымы жана улутубуздун колдоосу менен Түркия кылымы максатыбызга сөзсүз жетебиз.