АКШнын президенти Дональд Трамп Израилдин Газага каршы эки жылдык согушунан кийин АКШ координациялаган Эл аралык коопсуздук күчүнүн "жакында" Газага жайгаштырышы күтүлүп жатканын билдирди.
Бейшемби күнү кечинде Ак үйдө Борбор Азиядагы беш өлкөнүн лидерлери менен өткөрүлгөн иш-чарада Трамп Газага жайгаштырылышы күтүлгөн көп улуттуу кызмат күчүнө шилтеме кылып: "Бул жакында ишке ашат. Газага карата аракеттер абдан жакшы жүрүп жатат", - деди.
АКШ БУУнун Коопсуздук Кеңешине Трамптын 20 пункттан турган Газа тынчтык планына колдоо көрсөтүү максатында резолюция долбоорун сунуштады. Бул резолюция Эл аралык коопсуздук күчүн түзүүгө уруксат берүүнү камтыйт. Бул тууралуу АКШнын БУУдагы өкүлчүлүгү шаршемби күнү билдирди.
АКШ өкүлчүлүгүнүн басма сөз катчысы, АКШнын элчиси Майк Уолтцтун долбоорду Коопсуздук Кеңешинин шайланган 10 мүчөсүнө жана Түркия, Египет, Катар, Бириккен Араб Эмирликтери, Сауд Арабия сыяктуу бир нече аймактык өнөктөштөргө жөнөткөнүн айтты.
Резолюция боюнча добуш берүү күнү азырынча белгилене элек.
"Натыйжаларга жетүү"
АКШнын билдирүүсүндө резолюция "тынчтык планында көрсөтүлгөн Эл аралык коопсуздук күчүн" түзүүгө уруксат берери айтылган. Дипломатиялык булактардын маалыматына караганда, бир нече өлкө Эл аралык коопсуздук күчүнө кошулууга даяр экенин билдиришти, бирок аскерлерди жайгаштыруудан мурун Коопсуздук Кеңешинин токтом чыгарышын талап кылышууда.
АКШнын өкүлү "Президент Трамптын чечкиндүү лидерлиги менен АКШ БУУда чексиз талаш-тартыштарды эмес, кайрадан натыйжаларга жетишет", - деди.
Эл аралык күчтөрдү түзүү 10-октябрда Израиль менен ХАМАСтын ортосундагы ок атышууну токтотуу келишиминин негизги элементи болуп саналат.
Келишимге ылайык, аскерлер негизинен араб жана мусулман өлкөлөрүнөн тандалып, Израиль армиясы чыгып кеткенден кийин Газадагы коопсуздукту көзөмөлдөө үчүн жайгаштырылмакчы.
Газа боюнча сүйлөшүүлөр уланып жатканда Израиль күчтөрү бейшемби күнү эртең менен Батыш Жээктеги Женин шаарынын батышындагы Аль-Ямун шаарчасына аскердик чабуул жасап, 15 жаштагы палестиналык баланы набыт кылышты.
