Түркиянын президенти Режеп Таййип Эрдоган жума күнү Ирандын президенти Месуд Пезешкян менен телефон аркылуу сүйлөшүп, эки тараптуу карым  - катнаштарды жана аймактагы аскердик чыңалуунун күчөшүн карап чыгышты.

Түркия коммуникация башкармалыгынын билдирүүсүнө ылайык, эки лидер Түркия-Иран катнаштары менен бирге АКШ менен Ирандын ортосундагы акыркы чыңалуулардан келип чыккан коопсуздук коркунучтарын талкуулашты.

 Эрдоган сүйлөшүүдө Түркиянын Иран менен АКШнын ортосундагы чыңалууну басаңдатуу жана маселелерди чечүү үчүн жеңилдетүүчү ролду ойноого даяр экенин баса белгиледи.

 Билдирүүдө  Эрдоган Пезешкянга жума күнү Анкарада Ирандын тышкы иштер министрин кабыл алаарын билдиргени да белгиленди.

Аракчи: Түркия менен Ирандын ортосундагы карым - катнаштар ар дайым бекем болуп келген.

Ирандын тышкы иштер министри Аббас Аракчи жума күнү Түркия менен Ирандын ортосундагы тыгыз координация жана үзгүлтүксүз консультациялар аймактык кыйынчылыктарды жеңүү үчүн абдан маанилүү экенин баса белгиледи.

Стамбулга жасаган расмий сапары учурунда Иран мамлекеттик телекөрсөтүүсүнө маек берген Аракчи көптөгөн айлар мурун пландалган бул сапардын Түркиянын тышкы иштер министри Хакан Фидандын сапарынан кийин ишке ашканын жана эки тараптуу, аймактык жана эл аралык темаларды сүйлөшүүнү максат кылганын айтты.

Аракчи: «Иран менен Түркия ар дайым тыгыз сүйлөшүүлөрдү жүргүзүп келген маанилүү коңшу өлкөлөр. Бизде саясий, экономикалык, социалдык жана маданий тармактарда бекем байланыштар бар жана биз аймактык маселелер боюнча үзгүлтүксүз сүйлөшүүлөрдү жүргүзүп турабыз», - деди.

Ирандын тышкы иштер министри АКШ жана башка актерлор койгон максаттардын эки өлкөнүн позицияларын координациялоону, аймактык өнүгүүлөрдү карап чыгууну жана учурдагы кыйынчылыктарды кантип чечүү керектиги боюнча пикир алмашууну талап кылаарын белгиледи.

Аракчинин жума күнү тышкы иштер министри Хакан Фидандан кийин президент Режеп Таййип Эрдоган менен да жолугушуусу күтүлүүдө.