АКШнын президенти Дональд Трамп Пекинде Кытайдын төрагасы Си Цзиньпин менен жолугушууда АКШ-Кытай мамилелеринин келечегине оптимизмин билдирип, эки тараптуу карым-катнаштардын "мурдагыдан да жакшы" болорун айтты.

Трамп Кытай лидерине жеке жакындыгын баса белгилеп, Элдик жыйындар залындагы аземде Си Цзиньпиндин администрациясын: "Мен Кытайды жана жасаган ишиңизди абдан сыйлайм. Сиз мыкты лидерсиз. Сиздин досуңуз болгонума сыймыктанам", - деген сөздөр менен мактады.

Си болсо жолугушуунун башындагы билдирүүсүндө АКШнын президенти Трамп менен эки өлкөгө жана дүйнөгө тиешелүү маселелерди талкуулоону жана мамилелерди туура багытта жылдырып келечек үчүн жаңы барак ачууну каалагандарын айтты.

Эки лидердин ортосундагы саммит соода жана ишкердик мамилелерди кеңейтүүгө багытталды. Аймактык коопсуздук да саммиттин күн тартибинде болду; өзгөчө 28-февралда башталган АКШ менен Израилдин Иранга кол салууларынан кийинки Жакынкы Чыгыштагы чыңалуу талкууланды.

Учурда күчүндө болгон ок атышууну токтотууга карабастан, Кытай тараптарды диалогго чакырып, Вашингтон Бээжинди Ирандын аскердик жана экономикалык инфраструктурасын колдоп жатат деп айыптаган эле.

Трампты Кытайга сапарында мамлекеттик катчы Марко Рубио, коргоо министри Пит Хегсет жана Tesla, Nvidia, Apple сыяктуу ири америкалык компанияларынын башкы директорлорунан турган жогорку деңгээлдеги делегация коштоп жүрдү.

Дональд Трамп буга чейин президенттик кызмат учурунда 2017-жылы да Кытайга барган.