Ормуз кысыгы кризиси улантылууда, Түркия Сауд Арабиясы менен транзиттик сооданы баштап жатат
Түркия Республикасынын Соода министри Өмер Болат стратегиялык суу жолу аркылуу өтө албаган продукциялардын альтернативдүү логистикалык каналдар аркылуу багытталганын билдирди.
Соода министри Өмер Болат Түркиянын Ормуз кысыгындагы үзгүлтүктөрдөн улам аймак өлкөлөрүнө жеткирүүлөрдү улантуусу үчүн Сауд Арабиясы менен транзиттик сооданы баштаганын жарыялады.
Анкарада өткөрүлгөн салтанатта сөз сүйлөгөн министр Болат стратегиялык суу жолу аркылуу өтө албаган продукциялардын альтернативдүү логистикалык каналдар аркылуу багытталаарын айтып, Сауд Арабиясы менен түзүлгөн келишим менен транзиттик сооданы баштагандарын белгилеп: "Муну менен Ормуз кысыгы аркылуу өтө албаган продукциялардын айрымдарын куурлар аркылуу, айрымдарын кургактык транспорту менен аймак өлкөлөрүнө ташууну улантабыз", - деди.
Болат келишимдин алкагында транзиттик визалардын берилип баштаганын тастыктап, мунун Перс булуңундагы соода агымдарын улантууга жардам берерин кошумчалады.
Альтернативдүү багыттар
Болат февраль айынын аягында АКШ менен Израилдин Иранга кол салуусунун башталганына токтолуп: «Энергетикалык ресурстар жабылды. Ормуз кысыгынын жабылышы кайра иштетилген мунай продуктуларынын олуттуу бөлүгүн ташылбай турган абалга алып келди. Нефтехимиялык продукциялар, химиялык заттар жана жер семирткичтер сыяктуу продукцияларда да олуттуу көйгөйлөр жаралды", - деди.
Министр өкмөттүн экономикалык кызыкчылыктарга зыян келтирбөө үчүн иштеп жатканын баса белгиледи.
Түркиянын логистикада олуттуу ийгиликтерге жетишкенин белгилеген министр Түркиянын учурда 112 миллиард долларлык логистикалык тармагы бар экенин айтты.
Болат айыл чарбасы боюнча Түркиянын жетиштүү запасы бар экенин жана быйыл рекорддук өндүрүштү күтөрүн билдирди.
Министр өзгөчө : «Айыл чарбасындагы камсыздоо көйгөйлөрүн алдын алуу үчүн биз жер семирткичтердин жетиштүү запасын топтодук. Экспортту каттап, импортто бажы алымдарын нөлгө түшүрдүк», - деп кошумчалады.