Израилдеги ашынган улутчул "Жөөт күчү" партиясынын лидери жана Улуттук коопсуздук министри Итамар Бен-Гвир жалпы шайлоодон кийин түзүлө турган жаңы өкмөттө Коргоо министрлигинин ордун каалаганын, ал эми палестиналыктарды Газа тилкесинен жана оккупацияланган Батыш Шариадан кууп чыгуу планын партиясынын шайлоо убадасы катары жарыялады.
The Times of Israel гезитинин маалыматы боюнча, 27-октябрдагы шайлоо алдында Кудаста өткөн басма сөз жыйынында партиясынын өкмөттүк программасын коомчулукка жарыялаган Бен-Гвир Коргоо министрлигин өзүнө, ал эми партиянын экинчи орун басары Талли Готливге Юстиция министрлигин берүү шартын койду.
Бен-Гвирдин шайлоо алдындагы убадаларына палестиналыктарды Газа тилкесинен жана Батыш Шериадан чыгып кетүүгө "үндөө" деген шылтоо менен этникалык тазалоо, башкы прокурорду дароо кызматтан алуу, армияга карата юридикалык чектөөлөрдү жумшартуу жана сот бийлигинин көз карандысыздыгын түп-тамырынан бери алсыратуу пландары кирет.
Жаш кезинде оңчул жана расисттик кыймылдарга катышкандыктан аскердик кызматка жараксыз деп табылган жана эч качан армияда кызмат өтөбөгөн Бен-Гвир ушул айдын башында "ыктыярдуу көчүрүү" деген шылтоо менен "этникалык тазалоо" планын жарыялаган.
Израилдин маалымат каражаттары Бен-Гвирдин "Байланышты үзүү-710" деп аталган планы биринчи жылы 2,2 миллион адам жашаган Газадан болжол менен 250 000 палестиналыкты, үч жылдын ичинде 1,11 миллионду жана жети жылдын аягында 1,86 миллионго жакын адамды күч менен көчүрүүнү көздөгөнүн билдиришкен.
Израилдин коргоо министри Исраэл Кац да палестиналыктарды Газадан чыгаруу планы жоюлбаганын, ал дагы эле талкууланып жатканын, бирок учурда тоңдурулганын айткан.
Түркия, Египет, Индонезия, Иордания, Пакистан, Катар, Сауд Арабиясы жана Бириккен Араб Эмираттары Бен-Гвир менен Кацтын Газа тилкесинен палестиналыктарды көчүрүү боюнча билдирүүлөрүн кескин айыпташкан.
