Бириккен Улуттар Уюмунун Балдар Фонду (ЮНИСЕФ) Израилдин уланып жаткан кол салуулары жана гуманитардык жардамдардын толук блокадаланышынан улам Газада күн сайын орто эсеп менен 28 баланын каза болгонун жарыялады.

Дүйшөмбү күнү ЮНИСЕФ X платформасында жарыялаган билдирүүсүндө: "Жардыруулардан болгон өлүм. Жетишсиз тамактануу жана ачарчылыктан өлүм. Жардамдардын жана маанилүү тейлөөнүн жетишсиздигинен өлүм. Газада күн сайын бир классты толтурган тактап айтканда 28 бала каза болууда",- деп билдирди.

ЮНИСЕФ тез арада гуманитардык жардам көрсөтүүгө жана согушту токтотууга чакырып, Газадагы балдардын тамак-ашка, таза сууга, дары-дармекке жана коргоого абдан муктаж экенин баса белгилеп: «Эң башкысы, аларга ок атышпоо керек, ДАРОО АЗЫР», - деп билдирди.

Израилдин Газадагы геноциди

2023-жылдын 7-октябрынан бери Израиль Газада геноцид жүргүзүүдө.

Газанын Саламаттыкты сактоо министрлигинин маалыматына караганда, ушул убакка чейин болжол менен 61 миң палестиналык каза болду, алардын жарымына жакыны аялдар жана балдар, он миңдегени жарадар болду.

Согуш Газанын ден соолук жана гигиеналык инфраструктурасын талкалап, дээрлик бардык ооруканаларды жабууга мажбур кылды жана аймакты ачарчылыктын босогосуна алып келди. Жардам берүү уюмдары Израилдин чек арадан өтүүдөгү чектөөлөрүнөн улам азык-түлүк, дары-дармек жана күйүүчү май ташууга олуттуу тоскоолдуктардын жаралып жаткандыгын айтышууда.

Эл аралык ок атышууну токтотуу чакырыгы күчөгөнүнө карабастан, Израиль геноцидди улантууда.

ЮНИСЕФ жана башка гуманитардык уюмдар зордук-зомбулук токтобосо, Газадагы балдардын өлүмүнүн көрсөткүчү дагы өсө тургандыгын эскертүүдө.