Түштүк Кытай деңизинде АКШнын Аскер-деңиз флотунун эки учагы 30 мүнөттүк айырма менен кулап түштү
АКШнын Аскер-деңиз флоту эки кырсыктын тең себептери иликтенип жатканын билдирди.
Жекшемби күнү түштөн кийин USS Nimitz учак ташуучу кемесинен учкан согуштук учак жана тик учак Түштүк Кытай деңизине 30 мүнөттүн ичинде бири-биринен көз карандысыз түрдө кулап түштү деп билдирди АКШнын Тынч океан флоту.
MH-60R Sea Hawk тик учагындагы үч экипаж мүчөсү куткарылып, F/A-18F Super Hornet согуштук учагындагы эки учкуч катапульт аркылуу чыгып, аман-эсен табылды. Жалпысынан бешөө тең "коопсуз жана туруктуу абалда" деп билдирилди.
Эки кырсыктын себептери иликтенип жатканын флоттун билдирүүсүндө айтылды.
USS Nimitz кемеси жай мезгилинде Йемендеги хуситтердин соода кемелерине жасаган чабуулдарына жооп катары АКШ тарабынан Жакынкы Чыгышка жайгаштырылган болчу. Ал милдетин аяктап Вашингтон штатындагы Кицап аскер-деңиз базасындагы өзүнүн портуна кайтып келе жаткан.
Бул учак ташуучу кеменин кызматтан чыгарылганга чейинки акыркы жайгаштырылышы болуп саналат.
Дагы бир учак ташуучу кеме, USS Harry S Truman, акыркы айларда Жакынкы Чыгышка жайгаштырылган учурда бир катар кырсыктарга туш болгон.
Декабрда USS Gettysburg ракеталык крейсери катачылык менен Truman кемесинен учкан F/A-18 учагын атып түшүргөн.
Андан кийин, апрелде, дагы бир F/A-18 согуштук учагы Truman кемесинин ангар палубасынан тайып, Кызыл деңизге кулап кеткен.
Май айында болсо, Кызыл деңизде конуп жаткан F/A учагы конуу учурунда учактарды токтотуу үчүн колдонулган болот троско илинбей, деңизге кулап, эки учкуч катапульт аркылуу чыгып кеткен.
Бул окуялардын биринде да деңизчилер каза болгон эмес. Бул кырсыктар боюнча иликтөөлөрдүн жыйынтыгы азырынча жарыялана элек.