Израилдин Коргоо министри Исраэль Кац ишемби күнү жасаган билдирүүсүндө, улуттук коопсуздукка болгон олуттуу коркунучтарды негиз катары көрсөтүп, Израилдин Иранга каршы «алдын алуучу сокку» урганын айтты.
Кац өлкө боюнча өзгөчө кырдаал жарыялап, жарандарды Ички иштер министрлигинин көрсөтмөлөрүн аткарууга чакырды.
Министрликтин билдирүүсүндө: «Израиль мамлекети Иранга каршы «алдын алуучу соккуну» баштады. Коргоо министри Исраэль Кац өлкө боюнча атайын жана дароо күчүнө кирген өзгөчө кырдаал режимин жарыялады», — деп айтылды.
Көргөн күбөлөр Тегерандын борборунда катуу жарылуу болгонун, коюу түтүндүн көтөрүлгөнүн билдиришти. Иран өкмөтү азырынча расмий билдирүү жасай элек.
Fars News агенттигинин маалыматы боюнча, Исфахан, Кум, Кереж жана Керманшах шаарларында да жарылуу үндөрү угулду.
Бул чабуул Ирандын өзөктүк программасы боюнча АКШ менен жүргүзүлүп жаткан сүйлөшүүлөр учурундагы чыңалуу күчөгөн учурга туш келди.
Израиль армиясы ыктымалдуу ракеталык коркунучтарга каршы алдын алуу чарасы катары аба чабуулунан коргонуу сиреналарын ишке киргизди.
Армия ошондой эле «машыгуу иштерине, массалык иш-чараларга жана жумуш орундарына» тыюу салынганын жарыялады.
Аскердик билдирүүдө «турмуштук маанилүү тармактар» бул тыюу салуудан тышкары экендиги белгиленди.
Ирандын бардык жетекчи курамы бутага алынды
Аты-жөнүн атагысы келбеген АКШлык расмий өкүл жана операция тууралуу маалыматы бар бир булак, аскердик операциялардын купуялуулугунан улам ким экендигин жашыруу шарты менен жасаган билдирүүсүндө, АКШнын Иранга каршы чабуулга катышканын, бирок бул катышуунун масштабы азырынча белгисиз экенин айтышты.
Reuters агенттигине маалымат берген дагы бир америкалык жетекчи чабуулдардын абадан жана деңизден ишке ашырылганын айтты.
Иран менен Израиль аба мейкиндиктерин жапканын жарыялашты.
Биринчи кабарланган чабуул Ирандын диний лидери Аятулла Али Хаменеинин кеңселерине жакын аймакты бутага алды.
86 жаштагы Хаменеинин ошол учурда аймакта болуп же болбогону белгисиз. Бир расмий өкүл Reuters агенттигине Хаменеинин Тегеран тышында коопсуз жерге алып барылганын айтты.
Ирандын ISNA маалымат агенттиги Израилдин алгачкы чабуулунда араларында негизги оперативдүү кызматкерлер да болгон көп сандагы Төңкөрүш Гвардиясынын көптөгөн кызматкерлеринин каза болгонун жана жаралангандыгын билдирди.
