Араб жана ислам өлкөлөрү Ирандын «атайылап» жасалган баллистикалык ракета жана дрон чабуулдарын кескин айыпташты; биргелешкен билдирүүдө чабуулдарды тез арада токтотууга жана эл аралык укукту сыйлоого чакырык ташталды.

Түркия, Азербайжан, Бахрейн, Египет, Иордания, Кувейт, Ливан, Пакистан, Катар, Сауд Арабиясы, Сирия жана Бириккен Араб Эмирликтеринин тышкы иштер министрлери 18-мартта Эр-Риядда Ирандын акыркы чабуулдарын жана аймактагы кеңири эскалацияны талкуулоо үчүн жолугушту.

Министрлер чабуулдар коңшу өлкөлөрдөгү жарандык аймактарды жана инфраструктураны бутага алганын жана мындай аракеттерди эч кандай жагдайда актоого болбой турганын баса белгилешти.

БУУнун Уставынын 51-беренесине ылайык, мамлекеттер өздөрүн коргоого укуктуу экенин ырастап, министрлер Иранды чабуулдарын токтотууга жана чыңалууну басаңдатуу үчүн дипломатияга артыкчылык берүүгө чакырды.

Министрлер ошондой эле Иранды; Ормуз кысыгында эл аралык кеме жүрүүсүнө жана Баб-эль-Мандебдеги деңиз коопсуздугуна коркунуч келтирбөөгө жана араб өлкөлөрүндөгү куралдуу топторго колдоо көрсөтүүнү, каржылоону жана курал-жарак жардамын берүүнү токтотууга чакырды.

Ливандын эгемендүүлүгүн, туруктуулугун жана аймактык бүтүндүгүн колдой тургандыктарын дагы бир жолу ырастап, министрлер курал-жарактын толугу менен мамлекеттин көзөмөлүндө болушун камсыз кылуу аракеттерин колдой тургандыктарын билдиришти. Ошондой эле, алар Израилдин Ливанга кол салууларын жана анын аймактагы экспансиялык саясатын айыпташты.