Египеттин Шарм-эль-Шейх шаарында болгон жол кырсыгында үч катарлык дипломат каза тапты деп Египеттин маалымат каражаттары кабарлады.
Жекшемби күнү эртең менен Түштүк Синайдын негизги жолунда катарлык делегациянын унаасы кырсыкка учурап, эки дипломат жаракат алган.
Шарм-эль-Шейх менен Таба шаарларынын ортосундагы жолдо болгон кырсык тууралуу бийликке кабар берилген.
Каза болгондор Шарм-эль-Шейх эл аралык ооруканасынын өлүк сактоочу жайына жеткирилсе, жаракат алгандар ошол эле ооруканага дарыланууга жеткирилген.
Дүйшөмбү күнү Шарм-эль-Шейх шаарында эл аралык Газа саммити өтөт. Бул саммитти Египеттин президенти Абдель Фаттах ас-Сиси жана АКШнын президенти Дональд Трамп биргелешип жетектешет. Иш-чарага 20дан ашуун өлкөнүн өкүлдөрү катышат.
Египеттин президенттик билдирүүсүнө ылайык, саммиттин максаты – Газа тилкесиндеги согушту токтотуу, Жакынкы Чыгышта тынчтык жана туруктуулукту камсыз кылуу боюнча аракеттерди күчөтүү жана аймактык коопсуздуктун жаңы этабын баштоо болуп саналат.
