Париждеги саламаттыкты сактоо кызматкерлери кемеде вирус жуктурган француз бир аялдын абалы оорлошуп, жандандыруу бөлүмүндө жасалма дем алдыруучу аппаратка туташтырылганын билдиришти.
Мадридде өткөн маалымат жыйынында сөз сүйлөгөн Гебрейесус оор абалда калган кемени кабыл алып, «мээримдүүлүк жана тилектештик» көрсөткөндүгү үчүн испанияга ыраазычылык билдирди.
Учурдагы абал чоң масштабдагы эпидемиянын белгилерин камтыбаганын белгилеген Гебрейесус: «Бирок инкубациялык мезгилдин узактыгын эске алганда, алдыдагы жумаларда жаңы учурлардын катталышы толук мүмкүн», — деди.
Аргентинадан Жашыл Тумшук аралдарына (Кабо-Верде) багыт алган «MV Hondius» кемесиндеги эпидемиядан ушул күнгө чейин үч жүргүнчү каза болду, алардын бири германиялык, экөө нидерландылык жарандар. Дүйнөлүк Саламаттыкты Сактоо Уюму вирустун «Andes» вариантына чалдыккан тогуз учурду тастыктады. Кемеден эвакуациялангандардын арасында бир француз жана бир АКШ жаранынын тесттери оң жыйынтык көрсөттү.
Бейтаптардын абалы жана эвакуация процесси
Париждеги саламаттыкты сактоо кызматкерлери 65 жаштагы француз бейтап «өтө оор кардиопульмоналдык абалда» жандандыруу бөлүмүнө жаткырылганын жарыялашты.
Доктор Ксавье Лескюр бейтапты жасалма өпкө жана канды айлантуучу (байпас) аппараттын жардамы менен аман алып калуу аракеттери көрүлүп жатканын билдирди. Испаниянын Саламаттыкты сактоо министрлиги болсо, Мадриддеги аскердик ооруканада карантинге алынган 14 Испания жаранынын ичинен бирөөнүн тести оң жыйынтык көрсөткөнүн, бирок учурда анын абалы туруктуу экенин маалымдады.
Дүйнөлүк Саламаттыкты Сактоо Уюмунун директору биринчи учур 6-апрелде катталган болушу мүмкүн экенине көңүл буруп, жүргүнчүлөрдүн ортосундагы тыгыз байланыш жана 6-8 жумага созулган инкубациялык мезгилден улам жаңы учурлардын катталышы күтүлүп жатканын кайталады.
Эл аралык чаралар күчөтүлүүдө
Бириккен Королдуктун Саламаттыкты сактоо коопсуздугу боюнча агенттиги, эпидемияга байланыштуу Түштүк Атлантика аралдарынан 10 киши сактык максатында Британияга алып келинерин жарыялады. Нидерландыга жеткен эвакуациялык учактардагы 26 жүргүнчүнүн тесттери терс жыйынтык көрсөттү. Ал эми Неймегендеги ооруканада тийиштүү протоколдор сакталбастан бейтаптардын анализдери менен байланышта болгон 12 кызматкер алты жумалык карантинге алынды.
Тенерифеде күйүүчү май жана азык-түлүк толтурган MV Hondius кемеси азыр 25 адамдык команда, бир дарыгер жана бир медайым менен Роттердам портуна карай бара жатат. Испаниянын премьер-министри Педро Чансез дүйнөнүн өз алдынчалыкка эмес, биримдикке муктаж экенин айтып, эвакуация операциясына көрсөткөн колдоонун маанисине көңүлдөрдү бурду.
