Францияда эки жумага жакын созулган катуу ысыктан улам салкындоо үчүн сууга түшкөн 90дон ашуун адам чөгүп каза болду.

Франциянын спорт министри Марина Феррари RMC телеканалына берген маегинде 19-июндан бери катуу ысыкка байланыштуу 90дон ашуун адамдын сууга чөгүп каза болгонун айтып, мунун өтө кооптондурган көрсөткүч экенин билдирди.

Феррари акыркы күндөрү бул санда азаюу байкалганын, демек, бул кырдаал аптап эң жогорку чекке жеткенде жарандардын салкындоочу жерлерди издөөсүнө байланыштуу болгонун билдирди.

Өзгөчө аптаптуу аба ырайы таасирин тийгизе баштаган алгачкы күндөрү көптөгөн жаштардын сууга чөгүп кеткенин белгилеген Феррари каза болгондордун белгилүү бир курактык же социалдык профили жок экенин, өзгөчө балдарды кароосуз калтырбоо керектигин баса белгиледи.

Феррари жаштардын да көзөмөлсүз каналдарга кирүү менен кооптуу жүрүм-турумга барып жатканын билдирип, ачык сууда сүзүү боюнча машыгууну жакшыртуу зарылдыгын баса белгиледи.

Феррари сууга чөгүү учурларынын көбү бассейндерде эмес, көл жана ушул сыяктуу ачык сууларда катталганын кошумчалады.

Францияда июнь айынын ортосунан тарта башталган жана дээрлик эки жумага созулган аномалдуу ысыктан улам ооруканаларда кезектер көбөйсө, борбор шаар Парижде 26-июнда бир күндүн ичинде эле 109 адам аптаптын айынан көз жумган.