Түркиянын Тышкы иштер министрлиги Грециянын Эгей жана Иония деңиздеринде эки деңиз паркын жарыялоосуна байланыштуу билдирүү жасап, Эгей жана Жер Ортолук деңиздери сыяктуу жабык же жарым жабык деңиздерде бир тараптуу кыймылдардан алыс болуу керектигин баса белгиледи.
Министрлик Грециянын былтыр жарыялаган бул демилгесинин Түркия менен Грециянын ортосундагы бири-бирине байланыштуу Эгей маселелеринин контекстинде, эл аралык келишимдер менен Грецияга өткөрүлүп берилбеген географиялык түзүлүштөр менен бирге юридикалык жактан эч кандай натыйжа бербейт тургандыгын белгиледи.
Министрлик 2024-жылдын 9-апрелиндеги жазуу түрүндөгү билдирүүсүн эске салып, бул темадагы позициясын кайталап, ал билдирүүдөгү пункттардын бүгүн да күчүндө экендигин маалымдады.
Билдирүүдө: "Эл аралык деңиз укугу жээктеш мамлекеттердин арасында, анын ичинде айлана-чөйрөнү коргоо маселелери боюнча кызматташтыкты кубаттайт. Буга байланыштуу, биздин өлкө Эгей деңизине жээктеш мамлекет катары Греция менен кызматташууга ар дайым даяр экенин эскертебиз", - деп айтылды.
Министрлик айлана-чөйрөнү коргоо сыяктуу жалпы адамзаттык маселелердин Эгей деңизиндеги өз ара байланышкан көйгөйлөр жана эгемендүүлүгү эл аралык келишимдер менен Грецияга өткөрүлүп берилбеген кээ бир аралдардын, аралчалардын жана аскалардын статусуна байланыштуу маселелердин контекстинде кыянаттык менен пайдаланылышына болгон аракеттер кечээ кандай болсо, бүгүн дагы натыйжа бербей турганын баса белгиледи.
"Түркия жакынкы күндөрү деңиз аймактарында айлана-чөйрөнү коргоого багытталган долбоорлорун жарыялайт",- деп айтылып, Түркиянын Греция менен болгон мамилелеринде эки тарап тең сактагысы келген рухту чагылдырган 2023-жылдын 7-декабрындагы Афина декларациясынын алкагында көйгөйлөрдү эл аралык укук, адилеттүүлүк жана жакшы коңшулук принциптеринин негизинде чечүү үчүн чын ыкластуу жана ар тараптуу мамиле жасоо керектиги жөнүндөгү позициясын сактап калганы белгиленди.
