Президент Дональд Трамп АКШ даярдаган Орусия менен Украина согушун токтотуу боюнча 28-пункттук план анын “акыркы сунушу” болбой турганын айтып, аталган демилге Киев менен анын өнөктөштөрүндө тынчсыздануу жаратканына көңүл бурду.
«Биз тынчтыкка жеткибиз келет. Бул көптөн бери болушу керек эле. Орусия менен Украинанын согушу эч качан болбошу керек болчу», — деди Трамп Ак Үйдөн чыгып баратканда журналисттерге.
«Биз аны токтотууга аракет кылып жатабыз. Кандай болсо да, бир жол менен болобу, токтотушубуз керек»,-деп айткан Трамп эгер украин президенти Володимир Зеленский планды четке какса, «ал күчү жеткенче күрөшүүнү уланта берет» деп кошумчалады
Долбоордун жобосу Украина Орусияга кошумча аймактарды өткөрүп берүүгө, аскер күчтөрүнүн көлөмүн чектөөгө жана НАТОга мүчөлүк үчүн кайрылуусунан расмий баш тартууга мажбурлашы мүмкүн экени айтылып жатат.
Трамп украин кесиптеши Володимир Зеленскийге жооп берүүгө бейшембиге чейин мөөнөт берген.
Зеленский болсо өзүнүн алдында татаал чечим турганын айтып, ал «ар-намыстан ажыроо же негизги өнөктөшүбүздү жоготуу тобокелдиги» деген тандап алуунун турганын белгиледи.
Ошол эле күнү, тогуз Европа өлкөсүнүн лидерлери менен Япония, Канада жана Европа Биримдигинин жогорку кызмат адамдары пландын Украинанын аскер күчтөрүнө киргизүүнү сунуштаган чектөөлөрүнөн тынчсыздануу билдирип, бул чаралар «Украинаны келечекте жаңы чабуулдарга ачык калтырат» деп эскертишти.
Орусия 2022-жылдын февраль айында Украинага каршы «өзгөчө аскердик операция» баштаганын айтып, аны «денацификация жана демилитаризация» деп сыпаттаган.
Украинанын аскер күчтөрүнө чектөөлөр жана НАТОга кирүүгө тыюу салуу менен катар Москва орус тилинин Украинада расмий макамга ээ болушун талап кылууда.
