БУУнун Коопсуздук Кеңеши Франциянын өтүнүчү боюнча Израилдин Ливандын түштүгүндөгү аскердик ишмердүүлүгүн жана барган сайын кеңейген оккупациясын талкуулоо үчүн шашылыш жыйын өткөрдү. Жыйында мүчө мамлекеттер Израилдин Ливандын түштүгүнөн чыгып кетишин талап кылышты.
БУУнун Башкы катчысынын орун басары Марта Ама Акьяа Поби Израиль күчтөрүнүн Көк сызыктын түндүгүндө болушу Ливандын эгемендигин жана БУУнун Коопсуздук Кеңешинин 1701-резолюциясын бузат деп билдирип, Израилдин чыгып кетиши жана Ливандагы мамлекеттик эмес куралдуу топторду куралсыздандыруу зарылдыгын баса белгиледи.
Ливандын БУУдагы өкүлү Ахмад Арафа Израилди жарандык инфраструктураны, саламаттыкты сактоо кызматкерлерин жана тарыхый жерлерди бутага алган системалуу кыйратуу ишин жүргүзүп жатат деп айыптады.
Кеңештин мүчөлөрү Орусия жана Кытай Израилдин кургактагы операцияларды кеңейтүүсүн сынга алып, Газадагы кыйроолордун Ливанда кайталанышына каршы эскертишти. Франция менен Улуу Британия жаңжал үчүн Хизбулланы күнөөлөштү, Израилдин аскердик аракеттери ченемсиз экенин жана жарандарга зыян келтиргенин билдиришти.
Ошол эле учурда АКШ күнөөнү толугу менен Хизбулла менен Иранга жүктөп, Израилди сындагандан баш тартып, Ливан өкмөтүн колдоду.
