Кремлдин басма сөз катчысы Дмитрий Песков жекшемби күнү мамлекеттик телеканалга берген интервьюсунда Россиянын президенти Владимир Путиндин Украина боюнча тынчтык келишимин түзүүгө даяр, бирок Москванын негизги максаты - өз максаттарына жетүү экенин билдирди.

Песков АКШнын президенти Дональд Трамптын маал-маалы менен "катаал" позицияларына дүйнөнүн көнүп калганын, Трамптын ошентсе да Россияга байланыштуу билдирүүлөрүндө тынчтык келишимин издөө аракетин уланта турганын баса белгилегенин айтты.

Мамлекеттик телеканалдын кабарчысы Павел Зарубин менен сүйлөшкөн Песков: "Президент Путин Украина маселесин мүмкүн болушунча тезирээк тынчтык жолу менен чечүүнү кааларын бир нече жолу билдирген. Бул көпкө созулган процесс, күч-аракетти талап кылат жана оңой эмес", - деген сөздөрдү айтып, Россия үчүн эң негизгиси өз максаттарына жетүү экенин жана бул максаттардын ачык экенин кошумчалады.

Трамп дүйшөмбү күнү Россияга карата катаал позицияны карманып, Украинага жаңы аскердик жардамдарды, "Patriot" ракета коргонуу системаларын жөнөтөрүн жарыялаган. Трамп ошондой эле Россияга ок атышууну токтотуу үчүн 50 күндүк мөөнөт берди, болбосо кошумча санкцияларга дуушар болорун билдирди.

Бир тараптан мамлекеттик расмий маалымат агенттиги РИА жекшемби күнү орус коргоо министрлигинин билдирүүсүнө таянып, орус күчтөрүнүн Украинанын чыгышындагы Донецк аймагында Била Хора айылын көзөмөлгө алганын билдирди.