Коргоо министри Яшар Гүлер шейшемби күнкү билдирүүсүндө, ПКК жана ага байланыштуу бардык топтор таркоо чечиминин алкагында бардык аймактарда террористтик аракеттерин дароо токтотуп, куралдарын тапшырышы керектигин айтты.
Гүлер Анкаранын эч бир террористтик уюмдун аймакта тамырлашына жол бербей турганын кабарлады.
ПКК террордук уюму май айында Түркияга каршы ондогон жылдар бою жүргүзгөн куралдуу күрөшүнөн расмий түрдө баш тартып, он миңдеген адамдардын өмүрүн алган кагылышты токтоткон эле.
Яшар Гүлер ПКК, PYD, YPG жана SDG аттарын атап, алардын биринин да аймакта "тамырлашына" жол берилбей турганын баса белгиледи.
Гүлер Түрк куралдуу күчтөрүнүн сестентүүчү күчү биринчи кезекте террористтик уюмдарга каршы күрөштө көрсөтүлгөнүн жана түрк жоокерлеринин теңдешсиз аракеттеринин негизинде терроризмдин жоюлганын билдирди.
“Террордон арылган Түркия”
Түркия президент Режеп Таййип Эрдогандын жетекчилиги астында, куралдуу топтор жараткан коркунучту биротоло токтотууга багытталган "Террордон арылган Түркия" процессин баштады.
Анкаранын бул процесстин ийгиликтүү болушун чындап каалаганын айткан Гүлер, натыйжанын толугу менен террористтик топтордун зомбулуктан баш тартып, куралсызданышынан көз каранды экенин кошумчалады.
Гүлер ошондой эле Улуттук коргоо министрлиги менен Түрк куралдуу күчтөрү "Түркия кылымы" максаттарына ылайык, чоң жана күчтүү Түркия үчүн иш-аракеттерин чечкиндүүлүк менен уланта берерин маалымдады.
