АКШнын президенти Дональд Трамп Израилдин премьер-министри Биньямин Нетаньяхуга Түркия менен кандайдыр бир пикир келишпестикте "ийкемдүү болуусу керектигин" айтканын билдирди. Трамп ошондой эле Түркиянын президенти Режеп Таййип Эрдоган менен мамилесин жогору баалап, ортодогу көйгөйлөрдү чече аларына ишенгенин маалымдады.
Нетаньяхуну Овал кеңсесинде кабыл алган Трамп журналисттерге билдирүүсүндө: "Түркия менен кандайдыр бир көйгөйүң бар болсо, мен аны чече алам деп ойлойм. Албетте сен да ийкемдүү болсоң. Ийкемдүү болушуң керек. Баарыбыз ийкемдүү болушубуз керек," – деди.
Нетаньяхуга кайрылган Трамп: "Биби, эгер Түркия менен бир көйгөйүң болсо, аны чече аласың деп ишенем. Түркия жана анын лидерлери менен абдан жакшы карым-катнаштарым бар. Биз бул маселени чече алабыз деп ойлойм. Ошондуктан, бул көйгөй болбойт деп үмүттөнөм. Менимче, бул көйгөй болбойт," – деп кошумчалады. Трамп Нетаньяхуга кайрылып жатып Израилдин премьер-министринин каймана аты "Бибини" колдонду.
Трамп ошондой эле президент Эрдоган менен «эң жакшы мамиледе» экенин баса белгилеп, аны «катуу мүнөздүү, бирок абдан акылдуу» деп сыпаттады. Трамп Эрдогандын «башка эч ким жасай албаган нерсени жасаганын» айтты; бул сөздөрү менен ал өткөн жылдын декабрь айында Сириянын мурдагы лидери Башар Асаддын бийликтен кулатылышында Түркиянын негизги роль ойногонуна ишенимин дагы бир жолу кайталады.
Мурда да Түркияны «жакшы өлкө», президент Эрдоганды «жакшы лидер» деп сыпаттаган Трамп, элчиликке талапкерлер менен жолугушууда Түркияны мактап, андан кийин «Бул жакшы жер, лидери да жакшы»,- деген болчу.
