Түндүк Кореянын лидери Ким Чен Ын Украинадагы согушта Орусияны колдогону үчүн Гаагадагы Эл аралык кылмыш сотунда (ICC) согуш кылмыштары боюнча иликтөөгө дуушар болушу мүмкүн. Бул тууралуу ICCнин мурдагы төрагасы Сон Сан Хен билдирди.
Йонхап агенттигинин маалыматына караганда, Сон Сан Хен бул сөздөрдү Түштүк Кореянын борбору Сеулда өткөрүлгөн конференцияда айтты. Түндүк Корея өткөн айда Украинадагы согушта Орусияга колдоо көрсөтүү үчүн аскерлерин жөнөткөнүн ырастаган.
Пхеньян да Москва да Түндүк Кореянын аскерлери Украинага каршы согушта Орусияга жардам берип жатканын тастыкташты.
Сон Кимдин Түндүк Кореядагы адам укуктарынын бузулушуна байланыштуу Эл аралык кылмыш сотуна жеткирилбегенин, бирок Украинанын азыр Кимге каршы доо коюуга мыйзамдуу негиздер бар экенин белгиледи.
"Ким Чен Ынды ICCга алып барууга убакыт келди" - деген Сон, Пхеньяндын Орусияга аскердик колдоосу Украинага Түндүк Кореяга каршы арыз берүүсү үчүн укуктук негиз түзөрүн кошумчалады.
"Украинадан арыз түшсө идеалдуу болмок, бирок ICC өз алдынча көз карандысыз иликтөө баштоого да укуктуу", - деп айтты.
Ошондой эле ICCни Түндүк Кореянын жетекчилиги жана анын союздаштары тарабынан жасалышы мүмкүн болгон согуш кылмыштарына каршы күчтүү чара көрүүгө чакырды.
